Read the Bible

¹Klewewgh an ger ma, hwi vughes Bashan

neb usi war venydh Samaria,

neb a wask an voghosogyon, owth arwaska an edhommogyon,

neb a lever dh'aga gwer, ‘Doro, mayth yffyn!’

²An Arloedh Duw re dos ren y sansoleth:

Otta dydhyow a dheu warnowgh

ma'gas kemmerons dhe-ves gans kerdyn,

ha'n diwettha ahanowgh gans higennow-pysk.

³Ha hwi a dhe-ves der aswaow an fosow,

pub huni yn-rag yn unn rew;

ha tewlys yn-mes vydhowgh dhe Harmon,

⁴Dewgh dhe Bethel, ha kammdremenewgh;

dhe Gilgal, ha kammdremenewgh hwath moy;

drewgh agas sakrifisow pub myttin,

agas dega pub trydydh;

⁵offrynnewgh sakrifis a rasyans gans bara goell

ha gelwewgh tus dhe offrynnow bolonjedhek, deklaryewgh i;

rag hemm yw agas bodh, A vebyon Ysrael,

⁶Mes my a ros dhywgh glanythter a dhyns yn agas sitys oll

ha fowt a vara yn agas tylleryow oll,

ha ny dhehwelsowgh dhymm,

⁷Hag ynwedh my a skonyas a ri dhywgh an glaw,

ha tri mis hwath gesys kyns an drevas;

ha my a wrug glaw dhe goedha war unn sita

ha ny wrugavy glaw dhe goedha war sita arall;

war unn park glaw a goedh,

ha'n park na gavas glaw a wedhras;

⁸ytho diw sita po teyr a wandras dhe gen sita

dhe eva dowr, heb bos disyghys;

byttegyns ny dhehwelsowgh dhymm,

⁹My a'gas gweskis gans kleves losk ha kleves melynheans y'n ys;

agas lowarthyow ha gwinlannow pals,

agas figbrennyer ha'gas olewbrennyer a veu dybrys gans an lokust yowynk;

byttegyns ny dhehwelsowgh dhymm,

¹⁰Dannvon a wrug vy warnowgh pla dell wrug yn Ejyp;

ladha a wrug vy agas tus yowynk gans an kledha,

war-barth gans agas mergh kemmerys yn preydh.

My a dhrehevis fler agas kaslysyow bys yn agas dewfrik;

byttegyns ny dhehwelsowgh dhymm,

¹¹My a dhomhwelis rann ahanowgh,

dell wrug Duw domhwel Sodom ha Gomorra.

Kepar hag yttew y fewgh, tennys mes a'n tan,

byttegyns ny dhehwelsowgh dhymm,

¹²Rakhenna yndella y hwrav dhis, A Ysrael:

drefenn my dhe wul hemma dhis,

bydh parys dhe vetya dha Dhuw, A Ysrael!

¹³Rag otta, ev neb a form an menydhyow ha gul an gwyns,

neb a dheklar y vrys dhe vab-den;

neb a dreyl an myttin dhe dewlder,

ha stankya war dylleryow ughel an norvys –

an Arloedh, Duw an luyow yw y hanow!