Online Bible

Read the Bible

Version
Book
Chapter

Psalmyn 99

PSALM 99

1She yn Chiarn y Ree, lhig da’n pobble girree-magh myr sailliu: t’eh ny hoie eddyr ny cherubim ga dy vel y seihll cha anveagh.

2S’mooar ta’n Chiarn ayns Sion: as ard erskyn dy chooilley phobble.

3Ver ad booise da dt’Ennym’s: ta mooar, yindyssagh, as casherick.

4Ta pooar y ree graihagh er briwnys; t’ou er hoiaghey seose cairys: t’ou er chooilleeney briwnys as ynrickys ayns Jacob.

5O cur-jee ard-voylley da’n Chiarn y Jee ain: as tuitt-jee sheese er nyn ghlioonyn kiongoyrt rish stoyl e choshey, son t’eshyn casherick.

6Moses as Aaron mastey e haggyrtyn, as Samuel mâroosyn ta geamagh er e Ennym: deïe ad shoh er y Chiarn, as cheayll eh ad.

7Loayr eh roo ass y phillar vodjallagh: son dreill ad e recortyssyn, as y leigh v’eh er choyrt daue.

8Cheayll oo ad, O Hiarn nyn Yee: leih oo daue, O Yee, as ren oo kerraghey ny obbraghyn fardalagh oc.

9O cur-jee ard-voylley da’n Chiarn yn Jee ain, as jean-jee eshyn y ooashlaghey er e chronk casherick: son ta’n Chiarn yn Jee ain casherick.