Online Bible

Read the Bible

Version
Book
Chapter

Psalmyn 98

PSALM 98

1O gow-jee arrane noa gys y Chiarn: son t’eh er n’yannoo reddyn yindyssagh.

2Lesh e laue yesh hene, as lesh e roih chasherick: t’eh er gheddyn da hene yn varriaght.

3Ta’n Chiarn er hoilshaghey e haualtys: e chairys t’eh er hoiaghey magh dy foshlit ayns shilley ny ashoonyn.

4T’eh er chooinaghtyn er e vyghin as e ynrickys gys thie Israel: as ta ny ardjyn sodjey mooie jeh’n theihll er vakin saualtys y Jee ain.

5Jeeagh-jee shiu hene gennal gys y Chiarn, ooilley shiuish cheeraghyn: gow-jee arrane, gow-jee boggey, as cur-jee booise.

6Moylley-jee yn Chiarn er y chlaasagh: gow-jee arrane marish y chlaasagh lesh psalm dy hoyrt-booise.

7Lesh cayrnyn myrgeddin as shawmyn: O jeeagh-jee shiu hene gennal kiongoyrt rish y Chiarn y Ree.

8Lhig da’n faarkey feiyr y yannoo, as ooilley ny t’ayn: yn seihll cruin, as adsyn ta baghey ayn.

9Lhig da ny thooillaghyn nyn massyn y woalley, as lhig da ny croink ve gennal cooidjagh kiongoyrt rish y Chiarn: son t’eh cheet dy vriwnys y thalloo.

10Lesh ynrickys nee eh yn seihll y vriwnys: as y pobble lesh cairys.