Online Bible

Read the Bible

Version
Book
Chapter

Psalmyn 84

PSALM 84

1O cre cha eunyssagh ta dty chummallyn: uss Hiarn dy heshaght flaunys!

2Ta m’annym geearree as goaill foddeeaght dy gholl stiagh ayns cooyrtyn y Chiarn: ta my chree as m’eill goaill boggey ayns y Jee bio.

3Ta’n sparroo hene er gheddyn ynnyd, as yn gollan-geayee edd raad oddys ee e heïn y hroggal: dy jarroo ny altaryn ayd’s, O Hiarn jeh’n cheshaght flaunyssagh, my Ree as my Yee.

4Bannit t’adsyn ta baghey ayns dty hie: bee ad dy kinjagh cur moylley dhyt.

5Bannit ta’n dooinney ta’n niart echey aynyd’s: ayns e chree ta ny raaidyn ayd’s.

6Quoi ga dy vel eh goll trooid coan dy hreihys, t’eh jeeaghyn er myr farrane: as myr puill er nyn lhieeney lesh ushtey.

7Hed ad veih niart gys niart: as ta dagh unnane oc chebbal eh-hene fenish yn Jee dy Yeeghyn ayns Sion.

8O Hiarn Yee dy heshaght flaunys, clasht rish my phadjer: eaisht, O Yee Yacob.

9Cur-my-ner, O Yee nyn vendeilagh: as jeeagh er eddin dt’er-ooilit.

10Son ta un laa ayns dty chooyrtyn: ny share na thousane.

11Bare lhiam currym y dorrys y ve orrym ayns thie my Yee: na dy vaghey ayns cabbaneyn ny mee-chrauee.

12Son ta’n Chiarn Jee ny hoilshey as fendeilagh: ver y Chiarn grayse as gloyr: as cha bee nhee mie erbee er ny chummal vouesyn ta leeideil bea chrauee.

13O Hiarn Yee dy heshaght flaunys; bannit ta’n dooinney ta cur e hreishteil aynyd’s.