Online Bible

Read the Bible

Version
Book
Chapter

Psalmyn 83

PSALM 83

1Ny jean dty hengey y chummal, O Yee, ny bee kinjagh dty host: ny freill dty chooney voïn, O Yee.

2Son cur-my-ner, ta dty noidyn baggyrt dy ard: as t’adsyn ta feoh oc ort’s er droggal seose nyn ghing.

3T’ad er ghoaill smooinaghtyn croutagh noi dty phobble: as er chur nyn goyrle dy cheilley noi dty chloan chasherick.

4T’ad er ghra, Tar-jee, as lhig dooin ad y astyrt ass ny fraueyn, nagh bee ad arragh nyn bobble: as nagh bee ennym Israel ny sodjey ayns cooinaghtyn.

5Son t’ad er chur nyn ghing cooidjagh lesh un aigney: as er n’yannoo conaant cooidjagh dt’oï’s;

6Cabbaneyn ny Edomiteyn, as ny Ishmaeliteyn: ny Moabiteyn, as ny Hagareneyn;

7Gebal, as Ammon, as Amalek: ny Philistinee, marish cummaltee Tyre.

8Ta Assur neesht er hassoo lhieu: as er chooney lesh cloan Lot.

9Agh jean uss roosyn myr rish ny Midianiteyn: rish Sisera, as rish Jabin ec awin Kison;

10Va er nyn stroie ec Endor: as haink dy ve myr eoylley er y thalloo.

11Jean uss adsyn as ny princeyn oc goll-rish Oreb as Zeeb: dy jarroo, jean ooilley ny princeyn oc myr Zeba as Salmana;

12Ta gra, Lhig dooin goaill dooin hene: thieyn Yee son spooilley.

13O my Yee, cur orroo dy ve myr queeyl: as myr coau roish y gheay;

14’Naght myr ta’n aile lostey seose yn cheyll: as myr ta’n lossey lommey ny sleityn.

15Eiyr ad er yn aght cheddin lesh dty ghorrin: as jean ad agglagh lesh dty sterrym.

16Jean yn eddin oc y choodaghey lesh nearey, O Hiarn: dy vod ad shirrey dty ennym.

17Lhig daue ve er nyn goyrt naardey as seaghnit dy bragh ny smoo as ny smoo: lhig daue ve er nyn goyrt gys nearey, as cherraghtyn.

18As bee fys oc, dy nee uss ta’n ennym ayd Jehovah: yn ynrycan Er smoo syrjey harrish ooilley yn seihll.