Online Bible

Read the Bible

Version
Book
Chapter

Psalmyn 77

PSALM 77

1Eam-ym gys Jee lesh my choraa: dy jarroo gys Jee nee’m geamagh lesh my choraa, as nee eh m’y chlashtyn.

2Ayns traa my heaghyn hir mee yn Chiarn: ren my hing roie, as cha ghow eh fea fud-ny-hoie; ren m’annym gerjagh y obbal.

3Tra ta mee ayns trimshey, smooinee-ym er Jee: tra ta my chree seaghnit, nee’m gaccan.

4T’ou cummal my hooillyn dooisht: ta mee cha annoon nagh voddym loayrt.

5Ta mee er smooinaghtyn rhym pene er laghyn y chenn earish: as er ny bleeantyn t’er n’gholl shaghey.

6Ta mee tayrn gys cooinaghtyn m’arrane: as ayns yn oie ta mee resooney rish my chree hene, as ronsaghey magh m’annym.

7Jean y Chiarn eh-hene y reayll voym son dy bragh: as nagh bee eh foayroil arragh?

8Vel e vyghin dy slane er n’immeeaght son dy bragh: as vel e yialdyn er jeet dy bollagh gys jerrey brâ?

9Vel Jee er yarrood dy ve graysoil: as jean eh dooney e chenjallys-ghraihagh ayns jymmoose?

10As dooyrt mee, She m’annooinid hene eh: agh cooinee-yms er bleeantyn laue yesh yn Er smoo syrjey.

11Nee’m cooinaghtyn er obbraghyn y Chiarn: as tayrn-ym gys my smooinaghtyn ny yindyssyn ayd’s ayns y chenn earish.

12Nee’m smooinaghtyn myrgeddin er ooilley dt’obbraghyn: as bee my haggloo jeh dty yannoo.

13Dty raad, O Yee, te casherick: quoi eh ta Jee cha niartal as y Jee ain?

14Uss y Jee ta jannoo yindyssyn: as t’er hoilshaghey dty phooar mastey’n pobble.

15T’ou dy niartal er livrey dty phobble: dy jarroo mec Yacob as Yoseph.

16Honnick ny ushtaghyn oo, O Yee, honnick ny ushtaghyn oo, as v’ad agglit: ny diunidyn myrgeddin v’ad er nyn seiy.

17Gheayrt ny bodjallyn magh ushtey, ren yn aer taarnaghey: as hie dty hideyn magh dy lhean.

18Va feiyr dty haarnagh er ny chlashtyn dy chooilley raad mygeayrt: ren dty hendreil cur soilshey er y thalloo, va’n ooir er ny ghleashaght, as ooilley er-creau.

19Ta dty raad ayns yn aarkey, as dty chassanyn ayns ny ushtaghyn mooarey: as kesmadyn dty choshey, cha vel ad er nyn gronnaghey.

20Ren oo dty phobble y leeideil myr kirree: liorish laueyn Voses as Aaron.