Online Bible

Read the Bible

Version
Book
Chapter

Psalmyn 76

PSALM 76

1Ayns Judea ta enney er ny choyrt er Jee: ta’n ennym echey mooar ayns Israel.

2Ec Salem ta e chabbane-agglish: as e chummal ayns Sion.

3Ayns shen vrish eh sideyn y vhow: yn shleiy, yn cliwe, as y ghreïe-chaggee.

4T’ou jeh onnor as niart smoo: na croink ny roosteyryn.

5Ta’n vooinjer voyrnagh er nyn roostey, t’ad er ghoaill nyn gadley baaish: as ooilley ny deiney va ny laueyn oc niartal, cha vel ad er gheddyn monney.

6Ec yn oghsan ayd’s, O Yee Yacob: ta chammah yn ainagh as y cabbyl er duittym.

7T’ou uss, dy jarroo uss as aggle dy ve er ny ghoaill royd: as quoi oddys shassoo ayns dty hilley tra t’ou corree?

8Hug oo er dty vriwnys dy ve er ny chlashtyn veih niau: va’n ooir er-creau, as ve ny host,

9Tra dirree Jee gys briwnys: as dy chooney lesh ooilley yn vooinjer imlee er y thalloo.

10Nee elgys dooinney chyndaa gys dty voylley: as yn elgys ocsyn nee uss eh y smaghtaghey.

11Jean-jee gialdyn da’n Chiarn y Jee eu, as cooilleen-jee eh, ooilley shiuish ta mygeayrt-y-mysh: cur-jee lhieu giootyn huggeysyn lhisagh aggle ve goit roish.

12Nee eshyn ginjillaghey spyrryd princeyn: as t’eh yindyssagh mastey reeaghyn y thallooin.