Online Bible

Read the Bible

Version
Book
Chapter

Psalmyn 102

PSALM 102

1Clasht rish my phadjer, O Hiarn: as lhig da my eam roshtyn hood.

2Ny follee dt’eddin voym ayns earish my heaghyn: croym dty chleayshyn hym tra ta mee geamagh; O eaisht rhym, as shen dy feer leah.

3Son ta my laghyn er lheïe ersooyl myr jaagh: as ta my chraueyn chyrmit seose myr smarage aile.

4Ta my chree er vailleil as fioghit goll-rish faiyr: myr shen dy vel mee jarrood dy ee my arran.

5Kyndagh rish coraa my accan: s’coan nee my chraueyn lhiantyn gys m’eill.

6Ta mee goll-rish y pelican ’syn aasagh: as myr yn hullad ta goaill ayns yn eaynagh.

7Ta my chadley er gholl voym, as ta mee eer myr sparroo: ta soie ny-lomarcan er mullagh thie.

8Ta my noidyn dy m’oltooaney fey-ny-laa: as adsyn ta eulyssagh m’oï, t’ad er vreearrey cooidjagh dy my stroie.

9Son ta mee er n’ee leoie myr arran: as er heiy my yough lesh jeïr;

10As shen er coontey dty yymmoose as dty chorree: son t’ou er my hroggal seose, as er my hilgey sheese.

11Ta my laghyn er n’gholl shaghey myr scaa: as ta mee fioghit myr faiyr.

12Agh nee uss, O Hiarn, farraghtyn son dy bragh: as yn chooinaghtyn jeed trooid dy chooilley heeloghe.

13Nee oo girree as bee chymmey ayd er Sion: son te traa dy beagh myghin ayd urree, dy jarroo, ta’n traa er jeet.

14As cre’n-oyr? ta dty harvaantyn smooinaghtyn er ny voallaghyn eck: as s’treih lhieu dy akin ee ’sy joan.

15Nee ny ashoonyn aggle y ghoaill roish dt’Ennym, O Hiarn: as ooilley reeaghyn y theihll roish dt’Ard-ooashley;

16Tra nee yn Chiarn Sion y hroggal seose: as tra vees y ghloyr echey er ny hoilshaghey;

17Tra t’eh dy hyndaa eh-hene gys padjer ny boghtyn treigit: as nagh vel eh soiaghey beg jeh nyn aghin.

18Bee shoh er ny scrieu son cooinaghtyn da sheelogheyn ry-heet: as nee pobble nagh vel foast er ny ruggey yn Chiarn y voylley;

19Son t’eh er yeeaghyn neose veih ynnyd e chasherickys: magh ass niau hug y Chiarn yn seihll my-ner;

20Dy voddagh eh dobberan nyn lheid as ta ayns cappeeys y chlashtyn: as y chloan y livrey t’er nyn gheyrey gys baase;

21Dy voddagh ad Ennym y Chiarn y hoilshaghey ayns Sion: as e ooashley ec Jerusalem;

22Tra ta’n pobble er nyn jaglym cooidjagh: as ny reeriaghtyn myrgeddin dy hirveish y Chiarn.

23Ghow eh ersooyl my niart er my yurnah: as ren eh my laghyn giare.

24Agh dooyrt mee, O my Yee, ny gow mee ersooyl ayns mean m’eash: er son dty vleeantyn’s t’ad farraghtyn trooid dy chooilley heeloghe.

25T’ou uss, Hiarn, ayns y toshiaght er hoiaghey undin y thallooin: as ta ny niaughyn obbyr dty laueyn;

26Hed adsyn naardey, agh bee uss er-mayrn: aasee ad ooilley shenn myr garmad;

27As myr coamrey nee oo ad y chaghlaa, as bee ad er nyn gaghlaa: agh uss yn Jee cheddin, as cha jean dty vleeantyn’s failleil.

28Nee cloan dty harvaantyn tannaghtyn: as shassee yn sluight oc shickyr ayns dty hilley.