Read the Bible

¹Gofynnwch i’r ARGLWYDD am law

adeg tymor cawodydd y gwanwyn –

yr ARGLWYDD sy’n anfon y stormydd.

Bydd yn anfon cawodydd trwm o law

a bydd digon o gnydau yn tyfu i bawb.

²Mae eilun-ddelwau teuluol yn camarwain pobl,

a’r rhai sy’n dweud ffortiwn yn twyllo

– mae eu breuddwydion yn ffals,

a’u cysur yn ddiwerth.

Felly mae’r bobl yn crwydro fel defaid,

heb fugail i’w hamddiffyn.

³“Dw i wedi gwylltio’n lân gyda ‘bugeiliaid’ y gwledydd,

ac yn mynd i’w cosbi nhw – y ‘bychod’ sydd ar y blaen!”

Mae’r ARGLWYDD hollbwerus

yn mynd i ofalu am ei braidd, sef pobl Jwda,

a’u gwneud nhw fel ceffylau rhyfel cryfion.

⁴Ohonyn nhw y daw y garreg sylfaen,

Ohonyn nhw daw’r peg i ddal y babell,

Ohonyn nhw daw’r bwa rhyfel,

Ohonyn nhw daw pob arweinydd cryf.

⁵Byddan nhw fel milwyr dewr mewn brwydr

yn martsio drwy’r mwd ar faes y gâd.

Am fod yr ARGLWYDD gyda nhw,

byddan nhw’n ymladd

ac yn curo cafalri’r gelyn.

⁶“Dw i’n mynd i wneud teyrnas Jwda’n gryf,

ac achub pobl Israel.

Dw i’n mynd i ddod â nhw’n ôl

a dangos trugaredd atyn nhw –

bydd fel petawn i erioed wedi’u gwrthod nhw.

Fi ydy’r ARGLWYDD eu Duw nhw,

a dw i’n mynd i’w hateb nhw.

⁷Bydd pobl Israel fel milwyr dewr

yn dathlu fel petaen nhw wedi meddwi.

Bydd eu plant mor hapus wrth weld hynny,

ac yn gorfoleddu yn yr ARGLWYDD.

⁸Dw i’n mynd i chwibanu

i’w casglu nhw at ei gilydd –

dw i’n eu gollwng nhw’n rhydd!

Bydd cymaint ohonyn nhw ag o’r blaen.

⁹Er i mi eu gwasgaru drwy’r gwledydd,

byddan nhw’n meddwl amdana i mewn mannau pell –

a byddan nhw a’u plant yn dod yn ôl

¹⁰Bydda i’n dod â nhw yn ôl o’r Aifft,

ac yn eu casglu nhw o Asyria;

mynd â nhw i dir Gilead a Libanus,

a fydd hyd yn oed hynny ddim digon o le.

¹¹Byddan nhw’n croesi’r môr stormus,

a bydd e’n tawelu’r tonnau.

Bydd dŵr dwfn afon Nîl yn sychu,

balchder Asyria’n cael ei dorri,

a’r Aifft yn rheoli ddim mwy.

¹²Bydda i’n gwneud fy mhobl yn gryf,

a byddan nhw’n byw fel dw i’n dweud,”