Salm 80
Gweddi i adfer y genedl
I’r arweinydd cerdd: Salm gan Asaff ar “Lilïau’r Dystiolaeth”.
1Gwrando, o fugail Israel
sy’n arwain Joseff fel praidd.
Ti sydd wedi dy orseddu uwchben y cerwbiaid,
disgleiria 2o flaen Effraim, Benjamin, a Manasse!
Dangos dy nerth i ni, a thyrd i’n hachub!
3Adfer ni, O Dduw!
Gwena’n garedig arnon ni. Achub ni!
Notes for verses 1–31 entry
Cross-references
Psalms 80:3, 7, 19 – Numbers 6:25 ; Daniel 9:17
4O ARGLWYDD Dduw hollbwerus,
am faint mwy rwyt ti’n mynd i fod yn ddig
gyda gweddïau dy bobl?
5Ti wedi’u bwydo nhw â dagrau,
a gwneud iddyn nhw yfed dagrau wrth y gasgen.
6Ti wedi troi ein cymdogion yn ein herbyn;
mae’n gelynion yn gwneud sbort ar ein pennau.
7O Dduw hollbwerus, adfer ni!
Gwena’n garedig arnon ni. Achub ni!
8Cymeraist winwydden o’r Aifft,
a gyrru cenhedloedd i ffwrdd er mwyn ei thrawsblannu hi.
9Cliriaist le iddi,
er mwyn iddi fwrw gwreiddiau
a llenwi’r tir.
10Roedd ei chysgod dros y mynyddoedd,
a’i changhennau fel rhai coed cedrwydd.
11Roedd ei changhennau’n cyrraedd at y môr,
a’i brigau at afon Ewffrates.
Notes for verses 8–111 entry
Text notes
Psalms 80:11 y môr sef Môr y Canoldir. View in passage
12Pam wnest ti fwrw’r wal o’i chwmpas i lawr,
fel bod pwy bynnag sy’n pasio heibio yn pigo’i ffrwyth?
13Mae’r baedd gwyllt wedi tyrchu o dani,
a’r pryfed yn bwyta ei dail.
14O Dduw hollbwerus, tro yn ôl aton ni!
Edrych i lawr o’r nefoedd
ac archwilia gyflwr dy winwydden!
15Ti dy hun wnaeth ei phlannu,
a gwneud iddi dyfu.
16Ond bellach mae hi wedi’i llosgi a’i thorri i lawr!
Mae wedi’i difetha gan dy gerydd di.
17Nertha’r dyn rwyt wedi’i ddewis,
yr un dynol rwyt wedi’i wneud yn gryf.
18Wnawn ni ddim troi cefn arnat ti.
Adfywia ni, a byddwn ni’n galw ar dy enw.
19O ARGLWYDD Dduw hollbwerus, adfer ni!
Gwena’n garedig arnon ni. Achub ni!