Read the Bible

¹O Dduw, mae’r gwledydd paganaidd wedi cymryd dy dir.

Maen nhw wedi halogi dy deml sanctaidd

a throi Jerwsalem yn bentwr o gerrig.

²Maen nhw wedi gadael cyrff dy weision

yn fwyd i’r adar,

a chnawd dy bobl ffyddlon i anifeiliaid gwyllt.

³Mae gwaed dy bobl yn llifo

fel dŵr o gwmpas Jerwsalem,

a does neb i gladdu’r cyrff.

⁴Dŷn ni’n gyff gwawd i’n cymdogion;

ac yn destun sbort a dirmyg i bawb o’n cwmpas.

⁵Am faint mwy, O ARGLWYDD?

Fyddi di’n ddig am byth?

Fydd dy eiddigedd, sy’n llosgi fel tân, byth yn diffodd?

⁶Tywallt dy lid ar y bobloedd sydd ddim yn dy nabod

a’r teyrnasoedd hynny sydd ddim yn dy addoli!

⁷Nhw ydy’r rhai sydd wedi llarpio Jacob

a dinistrio’i gartref.

⁸Aethon ni ar gyfeiliorn, ond paid dal hynny yn ein herbyn.

Brysia! Dangos dosturi aton ni,

achos dŷn ni mewn trafferthion go iawn!

⁹Helpa ni, O Dduw ein hachubwr,

er mwyn dy enw da.

Achub ni a maddau ein pechodau,

er mwyn dy enw da.

¹⁰Pam ddylai’r paganiaid gael dweud,

“Ble mae eu Duw nhw?”

Gad i ni dy weld di’n rhoi gwers i’r cenhedloedd,

a thalu’n ôl iddyn nhw am dywallt gwaed dy weision.

¹¹Gwrando ar y carcharorion rhyfel yn griddfan!

Defnyddia dy nerth i arbed

y rhai sydd wedi’u condemnio i farwolaeth!

¹²Tala nôl yn llawn i’n cymdogion!

Maen nhw wedi dy enllibio di, Feistr.

¹³Yna byddwn ni, dy bobl

a phraidd dy borfa,

yn ddiolchgar i ti am byth

ac yn dy foli di ar hyd y cenedlaethau!