Read the Bible

¹O ARGLWYDD, rwyt ti’n fy archwilio i,

ac yn gwybod popeth amdana i.

²Ti’n gwybod pryd dw i’n eistedd ac yn codi;

ti’n gwybod beth sydd ar fy meddwl i o bell.

³Ti’n cadw golwg arna i’n teithio ac yn gorffwys;

yn wir, ti’n gwybod am bopeth dw i’n wneud.

⁴Ti’n gwybod beth dw i’n mynd i’w ddweud

cyn i mi agor fy ngheg, ARGLWYDD.

⁵Rwyt ti yna o mlaen i a’r tu ôl i mi,

mae dy law di arna i i’m hamddiffyn.

⁶Ti’n gwybod popeth amdana i! Mae tu hwnt i mi –

mae’n ddirgelwch llwyr, mae’n ormod i mi ei ddeall.

⁷Ble alla i fynd oddi wrth dy Ysbryd?

I ble alla i ddianc oddi wrthot ti?

⁸Petawn i’n mynd i fyny i’r nefoedd, rwyt ti yno;

petawn i’n gorwedd i lawr yn Annwn, dyna ti eto!

⁹Petawn i’n hedfan i ffwrdd gyda’r wawr

ac yn mynd i fyw dros y môr,

¹⁰byddai dy law yno hefyd, i’m harwain;

byddai dy law dde yn gafael yn dynn ynof fi.

¹¹Petawn i’n gofyn i’r tywyllwch fy nghuddio,

ac i’r golau o’m cwmpas droi’n nos,

¹²dydy hyd yn oed tywyllwch ddim yn dywyll i ti!

Mae’r nos yn olau fel y dydd i ti;

mae goleuni a thywyllwch yr un fath!

¹³Ti greodd fy meddwl a’m teimladau;

a’m plethu i yng nghroth fy mam.

¹⁴Dw i’n dy foli di,

am fod dy waith di mor syfrdanol a rhyfeddol!

Mae’r cwbl rwyt ti’n ei wneud yn anhygoel!

Ti’n fy nabod i i’r dim!

¹⁵Roeddet ti’n gweld fy ffrâm i

pan oeddwn i’n cael fy siapio yn y dirgel,

ac yn cael fy ngweu at ei gilydd yn nyfnder y ddaear.

¹⁶Roeddet ti’n fy ngweld i cyn bod siâp arna i!

Roedd hyd fy mywyd wedi’i drefnu –

pob diwrnod wedi’i gofnodi yn dy lyfr,

a hynny cyn i un fynd heibio!

¹⁷O Dduw, mae dy feddyliau di’n rhy ddwfn i mi;

mae gormod ohonyn nhw i’w deall!

¹⁸Petawn i’n ceisio’u cyfri nhw,

byddai mwy nag sydd o ronynnau tywod!

Bob tro dw i’n deffro

rwyt ti’n dal yna gyda mi!

¹⁹O Dduw, pam wnei di ddim lladd y rhai drwg,

a gwneud i’r dynion treisgar yma fynd i ffwrdd?

²⁰Maen nhw’n dweud pethau maleisus amdanat ti.

Dy elynion di ydyn nhw! Maen nhw’n dweud celwydd!.

²¹O ARGLWYDD, mae’n gas gen i’r rhai sy’n dy gasáu di.

Mae’r bobl sy’n dy herio yn codi pwys arna i.

²²Dw i’n eu casáu nhw â chas perffaith.

Maen nhw’n elynion i mi hefyd.

²³Archwilia fi, O Dduw, i weld beth sydd ar fy meddwl;

treiddia’n ddwfn, a deall fel dw i’n poeni.

²⁴Edrych i weld a ydw i’n gwneud rhywbeth o’i le,

ac arwain fi ar hyd yr hen lwybr.