Read the Bible

¹O ARGLWYDD, paid anghofio Dafydd.

Roedd e wedi cael amser mor galed.

²Roedd e wedi addo i’r ARGLWYDD

a thyngu llw i Un Cryf Jacob:

³“Dw i ddim am fynd i’r tŷ,

na dringo i’m gwely;

⁴dw i ddim am adael i’m llygaid orffwys,

na chau fy amrannau,

⁵nes dod o hyd i le i’r ARGLWYDD,

ie, rhywle i Un Cryf Jacob fyw.”

⁶Clywson fod yr Arch yn Effrata;

a dod o hyd iddi yng nghefn gwlad Jaar.

⁷Gadewch i ni fynd i mewn i’w dabernacl,

ac ymgrymu wrth ei stôl droed!

⁸O ARGLWYDD, dos i fyny i dy deml

gyda dy Arch bwerus!

⁹Boed i dy offeiriaid wisgo cyfiawnder,

boed i’r rhai sy’n ffyddlon i ti weiddi’n llawen!

¹⁰Paid troi cefn ar yr un rwyt wedi’i eneinio

o achos Dafydd dy was.

¹¹Roedd yr ARGLWYDD wedi addo i Dafydd

– aeth ar ei lw, a dydy e ddim yn torri ei air –

“Dw i’n mynd i osod un o dy ddisgynyddion di ar dy orsedd.

¹²Os bydd dy feibion yn cadw’r ymrwymiad wnaethon ni

a’r amodau dw i wedi’u gosod iddyn nhw,

bydd dy linach frenhinol yn para am byth.”

¹³Mae’r ARGLWYDD wedi dewis Seion;

mae e wedi penderfynu aros yno.

¹⁴“Dyma lle bydda i’n gorffwys am byth,” meddai,

“dw i’n mynd i deyrnasu yma. Ie, dyna dw i eisiau.

¹⁵Dw i’n mynd i’w gwneud hi’n ddinas lwyddiannus,

a rhoi digonedd o fwyd i’r rhai anghenus ynddi.

¹⁶Dw i’n mynd i roi achubiaeth yn wisg i’w hoffeiriaid,

a bydd ei rhai ffyddlon yn gweiddi’n llawen!

¹⁷Dw i’n mynd i godi olynydd cryf i Dafydd;

bydd fel lamp wedi’i rhoi i oleuo’r bobl.

¹⁸Bydda i’n gwisgo ei elynion mewn cywilydd,

ond bydd coron yn disgleirio ar ei ben e.”