Read the Bible

¹Dewch yma, chi wledydd, i wrando!

Gwrandwch ar hyn, chi bobloedd y byd!

Boed i’r ddaear a phawb arni wrando –

y byd, a phopeth sydd ynddo.

²Mae’r ARGLWYDD wedi digio gyda’r gwledydd;

mae’n wyllt gyda’u holl fyddinoedd,

a bydd yn eu dinistrio a’u lladd nhw.

³Bydd y rhai gaiff eu lladd yn cael eu taflu allan –

bydd y drewdod yn ofnadwy

a bydd y mynyddoedd wedi’u trochi â’u gwaed.

⁴Bydd y sêr i gyd yn diffodd,

a’r awyr yn cael ei rholio fel sgrôl.

Bydd y sêr i gyd yn syrthio

fel dail yn disgyn o’r winwydden,

neu ffrwyth aeddfed oddi ar goeden ffigys.

⁵“Bydd fy nghleddyf i’w weld yn yr awyr,

ac edrychwch, bydd yn syrthio ar Edom,

ar y bobl dw i wedi’u dedfrydu i’w difrodi.”

⁶Mae’r ARGLWYDD am drochi ei gleddyf mewn gwaed,

a’i fodloni gyda braster anifeiliaid –

gwaed ŵyn a bychod geifr,

a’r braster ar arennau hyrddod.

Ydy, mae’r ARGLWYDD yn cynnal aberth yn Bosra,

a lladdfa yn Edom.

⁷Bydd ychen gwyllt yn syrthio gyda nhw,

bustych a theirw.

Bydd eu tir wedi socian mewn gwaed,

a’r llawr wedi’i orchuddio gan fraster.

⁸Mae gan yr ARGLWYDD ddydd i ddial –

mae’n bryd i dalu’r pwyth yn ôl ar ran Seion.

⁹Bydd afonydd o byg yn gorlifo yn Edom,

a bydd ei phridd yn troi’n lafa.

Bydd ei thir yn troi’n byg sy’n llosgi,

¹⁰a fydd y tân ddim yn diffodd ddydd na nos;

bydd mwg yn codi ohono am byth.

Bydd yn gorwedd yn adfeilion am genedlaethau;

fydd neb yn cerdded y ffordd honno byth bythoedd.

¹¹Bydd tylluanod a draenogod yn ei meddiannu;

y dylluan wen a’r gigfran fydd yn nythu yno.

Bydd Duw yn ei mesur i achosi anhrefn

ac yn ei phwyso i’w gwagio.

¹²I ble’r aeth ei huchelwyr?

Does dim y fath beth â theyrnas ar ôl!

Mae ei harweinwyr i gyd wedi diflannu.

¹³Bydd drain yn tyfu yn ei phlastai,

danadl a mieri yn ei threfi caerog.

Bydd y wlad yn gartref i siacaliaid,

ac yn dir i’r estrys fyw ynddo.

¹⁴Bydd ysbrydion yr anialwch a bwganod yn cyfarfod yno,

a’r gafr-ddemoniaid yn galw ar ei gilydd.

Yno bydd creaduriaid y nos yn gorffwys ac yn nythu,

¹⁵a neidr wenwynig yn gorwedd ar ei hwyau,

i’w deor a gofalu amdanyn nhw.

Bydd adar rheibus hefyd yn casglu yno,

pob un gyda’i gymar.

¹⁶Astudiwch a darllenwch sgroliau’r ARGLWYDD,

heb adael dim allan, a heb golli llinell.

Yr ARGLWYDD sydd wedi gorchymyn y cwbl,

a’i ysbryd e sydd wedi’u casglu at ei gilydd.

¹⁷Fe sydd wedi rhoi ei siâr i bob un

ac wedi rhannu’r tir rhyngddyn nhw hefo llinyn mesur.

Bydd yn etifeddiaeth iddyn nhw am byth –

byddan nhw’n byw yno ar hyd yr oesoedd.