Read the Bible

¹Mae Effraim yn rhedeg ar ôl cysgodion –

mae fel ffŵl sy’n dyheu am wynt poeth y dwyrain!

Dim ond twyllo diddiwedd, a dinistr yn ei ddilyn.

Mae’n gwneud cytundeb gydag Asyria,

ac wedyn yn anfon olew olewydd yn dâl i’r Aifft!

²Mae’r ARGLWYDD am ddwyn achos yn erbyn Jwda:

bydd yn cosbi pobl Jacob am y ffordd maen nhw wedi ymddwyn;

talu’n ôl iddyn nhw am beth maen nhw wedi’i wneud.

³Daliodd ei frawd yn ôl yn y groth,

a hyd yn oed ymladd gyda Duw fel oedolyn!

⁴Reslo gydag angel heb golli –

crio a pledio arno i’w fendithio.

Dyma Duw yn ei gyfarfod yn Bethel

a siarad ag e yno –

⁵Ie, yr ARGLWYDD! Y Duw hollbwerus!

Yr ARGLWYDD ydy ei enw am byth!

⁶Rhaid i ti droi’n ôl at Dduw! –

byw bywyd o gariad a chyfiawnder,

a disgwyl yn ffyddiog am dy Dduw.

⁷Fel masnachwyr gyda chlorian sy’n twyllo,

maen nhw wrth eu boddau’n manteisio.

⁸Ac mae Effraim yn brolio: “Dw i’n gyfoethog!

Dw i wedi gwneud arian mawr!

A does neb yn gallu gweld y twyll;

neb yn gweld fy mod yn euog o unrhyw bechod.”

⁹“Fi ydy’r ARGLWYDD dy Dduw

ddaeth â ti allan o wlad yr Aifft.

Dw i’n mynd i wneud i ti fyw mewn pebyll eto,

fel pan wnes i dy gyfarfod yn yr anialwch.

¹⁰Dw i wedi siarad drwy’r proffwydi –

mewn gweledigaethau a negeseuon.”

¹¹Ydy Gilead yn addoli eilunod?

Ydy, a does dim dyfodol i’w phobl!

Ydyn nhw’n aberthu teirw yn Gilgal?

Ydyn, ond bydd eu hallorau fel pentwr o gerrig

mewn cae wedi’i aredig!

¹²Roedd rhaid i Jacob ddianc i wlad Aram –

gweithiodd Israel fel gwas i gael gwraig,

a chadw defaid i dalu amdani.

¹³Yna defnyddiodd yr ARGLWYDD broffwyd

i arwain Israel allan o’r Aifft,

ac i’w cadw nhw’n fyw yn yr anialwch.

¹⁴Ond mae Effraim wedi’i bryfocio i ddigio.

Bydd ei Feistr yn ei ddal yn gyfrifol am y tywallt gwaed,

ac yn gwneud iddo dalu am fod mor ddirmygus.