Read the Bible

¹Canwch i'r ARGLWYDD gân newydd,

canwch i'r ARGLWYDD yr holl ddaear.

²Canwch i'r ARGLWYDD, bendithiwch ei enw,

cyhoeddwch ei iachawdwriaeth o ddydd i ddydd.

³Dywedwch am ei ogoniant ymysg y bobloedd,

ac am ei ryfeddodau ymysg yr holl genhedloedd.

⁴Oherwydd mawr yw'r ARGLWYDD, a theilwng iawn o fawl;

y mae i'w ofni'n fwy na'r holl dduwiau.

⁵Eilunod yw holl dduwiau'r bobloedd,

ond yr ARGLWYDD a wnaeth y nefoedd.

⁶Y mae anrhydedd a mawredd o'i flaen,

nerth a gogoniant yn ei gysegr.

⁷Rhowch i'r ARGLWYDD, dylwythau'r cenhedloedd,

rhowch i'r ARGLWYDD anrhydedd a nerth;

⁸rhowch i'r ARGLWYDD anrhydedd ei enw,

dygwch offrwm a dewch i'w gynteddoedd.

⁹Ymgrymwch i'r ARGLWYDD yn ysblander ei sancteiddrwydd;

crynwch o'i flaen, yr holl ddaear.

¹⁰Dywedwch ymhlith y cenhedloedd, “Y mae'r ARGLWYDD yn frenin”;

yn wir, y mae'r byd yn sicr ac nis symudir;

bydd ef yn barnu'r bobloedd yn uniawn.

¹¹Bydded y nefoedd yn llawen a gorfoledded y ddaear;

rhued y môr a'r cyfan sydd ynddo,

¹²llawenyched y maes a phopeth sydd ynddo.

Yna bydd holl brennau'r goedwig yn canu'n llawen

¹³o flaen yr ARGLWYDD, oherwydd y mae'n dod,

oherwydd y mae'n dod i farnu'r ddaear.

Bydd yn barnu'r byd â chyfiawnder,

a'r bobloedd â'i wirionedd.