Read the Bible

¹Y mae Duw'n adnabyddus yn Jwda,

a'i enw'n fawr yn Israel;

²y mae ei babell wedi ei gosod yn Salem,

a'i gartref yn Seion.

³Yno fe faluriodd y saethau tanllyd,

y darian, y cleddyf a'r arfau rhyfel.

⁴Ofnadwy wyt ti, a chryfach

na'r mynyddoedd tragwyddol.

⁵Ysbeiliwyd y rhai cryf o galon,

y maent wedi suddo i gwsg,

a phallodd nerth yr holl ryfelwyr.

⁶Gan dy gerydd di, O Dduw Jacob,

syfrdanwyd y marchog a'r march.

⁷Ofnadwy wyt ti. Pwy a all sefyll o'th flaen

pan fyddi'n ddig?

⁸Yr wyt wedi cyhoeddi dedfryd o'r nefoedd;

ofnodd y ddaear a distewi

⁹pan gododd Duw i farnu,

ac i waredu holl drueiniaid y ddaear.

¹⁰Bydd Edom, er ei ddig, yn dy foliannu,

a gweddill Hamath yn cadw gŵyl i ti.

¹¹Gwnewch eich addunedau i'r ARGLWYDD eich Duw, a'u talu;

bydded i bawb o'i amgylch ddod â rhoddion i'r un ofnadwy.

¹²Y mae'n dryllio ysbryd tywysogion,

ac yn arswyd i frenhinoedd y ddaear.