Read the Bible

¹Bloeddiwch mewn gorfoledd i Dduw, yr holl ddaear;

²canwch i ogoniant ei enw;

rhowch iddo foliant gogoneddus.

³Dywedwch wrth Dduw, “Mor ofnadwy yw dy weithredoedd!

Gan faint dy nerth ymgreinia dy elynion o'th flaen;

⁴y mae'r holl ddaear yn ymgrymu o'th flaen,

ac yn canu mawl i ti,

yn canu mawl i'th enw.”

⁵Dewch i weld yr hyn a wnaeth Duw—

y mae'n ofnadwy yn ei weithredoedd tuag at bobl—

⁶trodd y môr yn sychdir,

aethant ar droed trwy'r afon;

yno y llawenychwn ynddo.

⁷Y mae ef yn llywodraethu â'i nerth am byth,

a'i lygaid yn gwylio dros y cenhedloedd;

na fydded i'r gwrthryfelwyr godi yn ei erbyn!

⁸Bendithiwch ein Duw, O bobloedd,

a seiniwch ei fawl yn glywadwy.

⁹Ef a roes le i ni ymysg y byw,

ac ni adawodd i'n troed lithro.

¹⁰Oherwydd buost yn ein profi, O Dduw,

ac yn ein coethi fel arian.

¹¹Dygaist ni i'r rhwyd,

rhoist rwymau amdanom,

¹²gadewaist i ddynion farchogaeth dros ein pennau,

aethom trwy dân a dyfroedd;

ond dygaist ni allan i ryddid.

¹³Dof i'th deml â phoethoffrymau,

talaf i ti fy addunedau,

¹⁴a wneuthum â'm gwefusau

ac a lefarodd fy ngenau pan oedd yn gyfyng arnaf.

¹⁵Aberthaf i ti basgedigion yn boethoffrymau,

a hefyd hyrddod yn arogldarth;

darparaf ychen a bychod geifr.

¹⁶Dewch i wrando, chwi oll sy'n ofni Duw,

ac adroddaf yr hyn a wnaeth Duw i mi.

¹⁷Gwaeddais arno â'm genau,

ac yr oedd moliant ar fy nhafod.

¹⁸Pe bawn wedi coleddu drygioni yn fy nghalon,

ni fuasai'r Arglwydd wedi gwrando;

¹⁹ond yn wir, gwrandawodd Duw,

a rhoes sylw i lef fy ngweddi.

²⁰Bendigedig fyddo Duw

am na throdd fy ngweddi oddi wrtho,

na'i ffyddlondeb oddi wrthyf.