Read the Bible

¹O Dduw, ti yw fy Nuw, fe'th geisiaf di;

y mae fy enaid yn sychedu amdanat,

a'm cnawd yn dihoeni o'th eisiau,

fel tir sych a diffaith heb ddŵr.

²Fel hyn y syllais arnat yn y cysegr,

a gweld dy rym a'th ogoniant.

³Y mae dy ffyddlondeb yn well na bywyd;

am hynny bydd fy ngwefusau'n dy foliannu.

⁴Fel hyn y byddaf yn dy fendithio trwy fy oes,

ac yn codi fy nwylo mewn gweddi yn dy enw.

⁵Caf fy nigoni, fel pe ar fêr a braster,

a moliannaf di â gwefusau llawen.

⁶Pan gofiaf di ar fy ngwely,

a myfyrio amdanat yng ngwyliadwriaethau'r nos—

⁷fel y buost yn gymorth imi,

ac fel yr arhosais yng nghysgod dy adenydd—

⁸bydd fy enaid yn glynu wrthyt;

a bydd dy ddeheulaw yn fy nghynnal.

⁹Ond am y rhai sy'n ceisio difetha fy mywyd,

byddant hwy'n suddo i ddyfnderau'r ddaear;

¹⁰fe'u tynghedir i fin y cleddyf,

a byddant yn ysglyfaeth i lwynogod.

¹¹Ond bydd y brenin yn llawenhau yn Nuw,

a bydd pawb sy'n tyngu iddo ef yn gorfoleddu,

oherwydd caeir safnau'r rhai celwyddog.