Read the Bible

¹Chwi gedyrn, a ydych mewn difri'n dedfrydu'n gyfiawn?

A ydych yn barnu pobl yn deg?

²Na! Yr ydych â'ch calonnau'n dyfeisio drygioni,

ac â'ch dwylo'n gwasgaru trais dros y ddaear.

³Y mae'r drygionus yn wrthryfelgar o'r groth,

a'r rhai sy'n llefaru celwydd yn cyfeiliorni o'r bru.

⁴Y mae eu gwenwyn fel gwenwyn sarff,

fel asb fyddar sy'n cau ei chlustiau,

⁵a heb wrando ar sain y swynwr

sy'n taenu ei hudoliaeth ryfedd.

⁶O Dduw, dryllia'r dannedd yn eu genau,

diwreiddia gilddannedd y llewod, O ARGLWYDD.

⁷Bydded iddynt ddiflannu fel dŵr a mynd ymaith,

a chrino fel gwellt a sethrir;

⁸byddant fel erthyl sy'n diflannu,

ac fel marw-anedig na wêl olau dydd.

⁹Cyn iddynt wybod bydd yn eu diwreiddio;

yn ei ddig bydd yn eu sgubo ymaith fel chwyn.

¹⁰Bydd y cyfiawn yn llawenhau am iddo weld dialedd,

ac yn golchi ei draed yng ngwaed y drygionus.

¹¹A dywed pobl, “Yn ddios y mae gwobr i'r cyfiawn;

oes, y mae Duw sy'n gwneud barn ar y ddaear.”