Read the Bible

¹Bydd drugarog wrthyf, O Dduw, bydd drugarog wrthyf,

oherwydd ynot ti yr wyf yn llochesu;

yng nghysgod dy adenydd y mae fy lloches

nes i'r stormydd fynd heibio.

²Galwaf ar y Duw Goruchaf,

ar y Duw sy'n gweithredu drosof.

³Bydd yn anfon o'r nefoedd i'm gwaredu;

bydd yn cywilyddio'r rhai sy'n gwasgu arnaf;

bydd Duw yn anfon ei gariad a'i wirionedd.

⁴Yr wyf yn byw yng nghanol llewod,

rhai sy'n traflyncu pobl,

a'u dannedd yn bicellau a saethau,

a'u tafod yn gleddyf miniog.

⁵Ymddyrchafa'n uwch na'r nefoedd, O Dduw,

a bydded dy ogoniant dros yr holl ddaear.

⁶Y maent wedi gosod rhwyd i'm traed,

ac wedi darostwng fy mywyd;

y maent wedi cloddio pwll ar fy nghyfer,

ond hwy eu hunain fydd yn syrthio iddo.

⁷Y mae fy nghalon yn gadarn, O Dduw,

y mae fy nghalon yn gadarn;

fe ganaf a rhoi mawl.

⁸Deffro, fy enaid,

deffro di, nabl a thelyn.

Fe ddeffroaf ar doriad gwawr.

⁹Rhof ddiolch i ti, O Arglwydd, ymysg y bobloedd,

a chanmolaf di ymysg y cenhedloedd,

¹⁰oherwydd y mae dy gariad yn ymestyn hyd y nefoedd,

a'th wirionedd hyd y cymylau.

¹¹Ymddyrchafa'n uwch na'r nefoedd, O Dduw,

a bydded dy ogoniant dros yr holl ddaear.