Read the Bible

¹Gwrando, O Dduw, ar fy ngweddi;

paid ag ymguddio rhag fy neisyfiad.

²Gwrando arnaf ac ateb fi;

yr wyf wedi fy llethu gan fy nghwyn.

³Yr wyf bron â drysu gan sŵn y gelyn,

gan grochlefain y drygionus;

oherwydd pentyrrant ddrygioni arnaf,

ac ymosod arnaf yn eu llid.

⁴Y mae fy nghalon mewn gwewyr,

a daeth ofn angau ar fy ngwarthaf.

⁵Daeth arnaf ofn ac arswyd,

ac fe'm meddiannwyd gan ddychryn.

⁶A dywedais, “O na fyddai gennyf adenydd colomen,

imi gael ehedeg ymaith a gorffwyso!

⁷Yna byddwn yn crwydro ymhell

ac yn aros yn yr anialwch;

⁸“brysiwn i gael cysgod

rhag y gwynt stormus a'r dymestl.”

⁹O Dduw, cymysga a rhanna'u hiaith,

oherwydd gwelais drais a chynnen yn y ddinas;

¹⁰ddydd a nos y maent yn ei hamgylchu ar y muriau,

ac y mae drygioni a thrybini o'i mewn,

¹¹dinistr yn ei chanol;

ac nid yw twyll a gorthrwm

yn ymadael o'i marchnadfa.

¹²“Ond nid gelyn a'm gwawdiodd—

gallwn oddef hynny;

nid un o'm caseion a'm bychanodd—

gallwn guddio rhag hwnnw;

¹³ond ti, fy nghydradd,

fy nghydymaith, fy nghydnabod—

¹⁴buom mewn cyfeillach felys â'n gilydd

wrth gerdded gyda'r dyrfa yn nhŷ Dduw.

¹⁵“Doed marwolaeth arnynt;

bydded iddynt fynd yn fyw i Sheol,

am fod drygioni'n cartrefu yn eu mysg.

¹⁶Ond gwaeddaf fi ar Dduw,

a bydd yr ARGLWYDD yn fy achub.

¹⁷Hwyr a bore a chanol dydd

fe gwynaf a griddfan,

a chlyw ef fy llais.

¹⁸Gwareda fy mywyd yn ddiogel

o'r rhyfel yr wyf ynddo,

oherwydd y mae llawer i'm herbyn.

¹⁹Gwrendy Duw a'u darostwng—

y mae ef wedi ei orseddu erioed—

“am na fynnant newid nac ofni Duw.

²⁰“Estynnodd fy nghydymaith ei law yn erbyn ei gyfeillion,

torrodd ei gyfamod.

²¹Yr oedd ei leferydd yn esmwythach na menyn,

ond yr oedd rhyfel yn ei galon;

yr oedd ei eiriau'n llyfnach nag olew,

ond yr oeddent yn gleddyfau noeth.

²²“Bwrw dy faich ar yr ARGLWYDD,

ac fe'th gynnal di;

ni ad i'r cyfiawn gael ei ysgwyd byth.

²³Ti, O Dduw, a'u bwria i'r pwll isaf—

rhai gwaedlyd a thwyllodrus—

ni chânt fyw hanner eu dyddiau.

Ond ymddiriedaf fi ynot ti.”