Read the Bible

¹O ŵr grymus, pam yr ymffrosti yn dy ddrygioni

yn erbyn y duwiol yr holl amser?

²Yr wyt yn cynllwyn distryw;

y mae dy dafod fel ellyn miniog,

ti dwyllwr.

³Yr wyt yn caru drygioni'n fwy na daioni,

a chelwydd yn fwy na dweud y gwir.

⁴Yr wyt yn caru pob gair difaol

ac iaith dwyllodrus.

⁵Bydd Duw'n dy dynnu i lawr am byth,

bydd yn dy gipio ac yn dy dynnu o'th babell,

ac yn dy ddadwreiddio o dir y byw.

⁶Bydd y cyfiawn yn gweld ac yn ofni,

yn chwerthin am ei ben ac yn dweud,

⁷“Dyma'r un na wnaeth Dduw yn noddfa,

ond a ymddiriedodd yn nigonedd ei drysorau,

a cheisio noddfa yn ei gyfoeth ei hun.”

⁸Ond yr wyf fi fel olewydden iraidd yn nhŷ Dduw;

ymddiriedaf yn ffyddlondeb Duw byth bythoedd.

⁹Diolchaf iti hyd byth am yr hyn a wnaethost;

cyhoeddaf dy enw—oherwydd da yw—ymysg dy ffyddloniaid.