Read the Bible

¹Fel y dyhea ewig am ddyfroedd rhedegog,

felly y dyhea fy enaid amdanat ti, O Dduw.

²Y mae fy enaid yn sychedu am Dduw, am y Duw byw;

pa bryd y dof ac ymddangos ger ei fron?

³Bu fy nagrau'n fwyd imi ddydd a nos,

pan ofynnent imi drwy'r dydd, “Ple mae dy Dduw?”

⁴Tywalltaf fy enaid mewn gofid wrth gofio hyn—

fel yr awn gyda thyrfa'r mawrion i dŷ Dduw

yng nghanol banllefau a moliant, torf yn cadw gŵyl.

⁵Mor ddarostyngedig wyt, fy enaid,

ac mor gythryblus o'm mewn!

Disgwyliaf wrth Dduw; oherwydd eto moliannaf ef,

fy Ngwaredydd a'm Duw.

⁶Y mae fy enaid yn ddarostyngedig ynof;

am hynny, meddyliaf amdanat ti

o dir yr Iorddonen a Hermon

ac o Fynydd Misar.

⁷Geilw dyfnder ar ddyfnder

yn sŵn dy raeadrau;

y mae dy fôr a'th donnau

wedi llifo trosof.

⁸Liw dydd y mae'r ARGLWYDD yn gorchymyn ei ffyddlondeb,

a liw nos y mae ei gân gyda mi,

gweddi ar Dduw fy mywyd.

⁹Dywedaf wrth Dduw, fy nghraig,

“Pam yr anghofiaist fi?

Pam y rhodiaf mewn galar,

wedi fy ngorthrymu gan y gelyn?”

¹⁰Fel pe'n dryllio fy esgyrn,

y mae fy ngelynion yn fy ngwawdio,

ac yn dweud wrthyf trwy'r dydd,

“Ple mae dy Dduw?”

¹¹Mor ddarostyngedig wyt, fy enaid,

ac mor gythryblus o'm mewn!

Disgwyliaf wrth Dduw; oherwydd eto moliannaf ef,

fy Ngwaredydd a'm Duw.