Read the Bible

¹Na fydd yn ddig wrth y rhai drygionus,

na chenfigennu wrth y rhai sy'n gwneud drwg.

²Oherwydd fe wywant yn sydyn fel glaswellt,

a chrino fel glesni gwanwyn.

³Ymddiried yn yr ARGLWYDD a gwna ddaioni,

iti gael byw yn y wlad mewn cymdeithas ddiogel.

⁴Ymhyfryda yn yr ARGLWYDD,

a rhydd iti ddeisyfiad dy galon.

⁵Rho dy ffyrdd i'r ARGLWYDD;

ymddiried ynddo, ac fe weithreda.

⁶Fe wna i'th gywirdeb ddisgleirio fel goleuni

a'th uniondeb fel haul canol dydd.

⁷Disgwyl yn dawel am yr ARGLWYDD,

aros yn amyneddgar amdano;

paid â bod yn ddig wrth yr un sy'n llwyddo,

y gŵr sy'n gwneud cynllwynion.

⁸Paid â digio; rho'r gorau i lid;

paid â bod yn ddig, ni ddaw ond drwg o hynny.

⁹Oherwydd dinistrir y rhai drwg,

ond bydd y rhai sy'n gobeithio yn yr ARGLWYDD yn etifeddu'r tir.

¹⁰Ymhen ychydig eto, ni fydd y drygionus;

er iti edrych yn ddyfal am ei le, ni fydd ar gael.

¹¹Ond bydd y gostyngedig yn meddiannu'r tir

ac yn mwynhau heddwch llawn.

¹²Y mae'r drygionus yn cynllwyn yn erbyn y cyfiawn,

ac yn ysgyrnygu ei ddannedd arno;

¹³ond y mae'r Arglwydd yn chwerthin am ei ben,

oherwydd gŵyr fod ei amser yn dyfod.

¹⁴Y mae'r drygionus yn chwifio cleddyf

ac yn plygu eu bwa,

i ddarostwng y tlawd a'r anghenus,

ac i ladd yr union ei gerddediad;

¹⁵ond fe drywana eu cleddyf i'w calon eu hunain,

a thorrir eu bwâu.

¹⁶Gwell yw'r ychydig sydd gan y cyfiawn

na chyfoeth mawr y drygionus;

¹⁷oherwydd torrir nerth y drygionus,

ond bydd yr ARGLWYDD yn cynnal y cyfiawn.

¹⁸Y mae'r ARGLWYDD yn gwylio dros ddyddiau'r difeius,

ac fe bery eu hetifeddiaeth am byth.

¹⁹Ni ddaw cywilydd arnynt mewn cyfnod drwg,

a bydd ganddynt ddigon mewn dyddiau o newyn.

²⁰Oherwydd fe dderfydd am y drygionus;

bydd gelynion yr ARGLWYDD fel cynnud mewn tân,

pob un ohonynt yn diflannu mewn mwg.

²¹Y mae'r drygionus yn benthyca heb dalu'n ôl,

ond y cyfiawn yn rhoddwr trugarog.

²²Bydd y rhai a fendithiwyd gan yr ARGLWYDD yn etifeddu'r tir,

ond fe dorrir ymaith y rhai a felltithiwyd ganddo.

²³Yr ARGLWYDD sy'n cyfeirio camau'r difeius,

y mae'n ei gynnal ac yn ymhyfrydu yn ei gerddediad;

²⁴er iddo syrthio, nis bwrir i'r llawr,

oherwydd y mae'r ARGLWYDD yn ei gynnal â'i law.

²⁵Bûm ifanc, ac yn awr yr wyf yn hen,

ond ni welais y cyfiawn wedi ei adael,

na'i blant yn cardota am fara;

²⁶y mae bob amser yn drugarog ac yn rhoi benthyg,

a'i blant yn fendith.

²⁷Tro oddi wrth ddrwg a gwna dda,

a chei gartref diogel am byth,

²⁸oherwydd y mae'r ARGLWYDD yn caru barn,

ac nid yw'n gadael ei ffyddloniaid;

ond difethir yr anghyfiawn am byth,

a thorrir ymaith blant y drygionus.

²⁹Y mae'r cyfiawn yn etifeddu'r tir,

ac yn cartrefu ynddo am byth.

³⁰Y mae genau'r cyfiawn yn llefaru doethineb,

a'i dafod yn mynegi barn;

³¹y mae cyfraith ei Dduw yn ei galon,

ac nid yw ei gamau'n methu.

³²Y mae'r drygionus yn gwylio'r cyfiawn

ac yn ceisio cyfle i'w ladd;

³³ond nid yw'r ARGLWYDD yn ei adael yn ei law,

nac yn caniatáu ei gondemnio pan fernir ef.

³⁴Disgwyl wrth yr ARGLWYDD a glŷn wrth ei ffordd,

ac fe'th ddyrchafa i etifeddu'r tir,

a chei weld y drygionus yn cael eu torri ymaith.

³⁵Gwelais y drygionus yn ddidostur,

yn taflu fel blaguryn iraidd;

³⁶ond pan euthum heibio, nid oedd dim ohono;

er imi chwilio amdano, nid oedd i'w gael.

³⁷Sylwa ar y difeius, ac edrych ar yr uniawn;

oherwydd y mae disgynyddion gan yr heddychlon.

³⁸Difethir y gwrthryfelwyr i gyd,

a dinistrir disgynyddion y drygionus.

³⁹Ond daw gwaredigaeth y cyfiawn oddi wrth yr ARGLWYDD;

ef yw eu hamddiffyn yn amser adfyd.

⁴⁰Bydd yr ARGLWYDD yn eu cynorthwyo ac yn eu harbed;

bydd yn eu harbed rhag y drygionus ac yn eu hachub,

am iddynt lochesu ynddo.