Read the Bible

¹Molwch yr ARGLWYDD.

Molwch yr ARGLWYDD o'r nefoedd,

molwch ef yn yr uchelderau.

²Molwch ef, ei holl angylion;

molwch ef, ei holl luoedd.

³Molwch ef, haul a lleuad;

molwch ef, yr holl sêr disglair.

⁴Molwch ef, nef y nefoedd,

a'r dyfroedd sydd uwch y nefoedd.

⁵Bydded iddynt foli enw'r ARGLWYDD,

oherwydd ef a orchmynnodd, a chrewyd hwy;

⁶fe'u gwnaeth yn sicr fyth bythoedd;

rhoes iddynt ddeddf nas torrir.

⁷Molwch yr ARGLWYDD o'r ddaear,

chwi ddreigiau a'r holl ddyfnderau,

⁸tân a chenllysg, eira a mwg,

y gwynt stormus sy'n ufudd i'w air;

⁹y mynyddoedd a'r holl fryniau,

y coed ffrwythau a'r holl gedrwydd;

¹⁰anifeiliaid gwyllt a'r holl rai dof,

ymlusgiaid ac adar hedegog;

¹¹brenhinoedd y ddaear a'r holl bobloedd,

tywysogion a holl farnwyr y ddaear;

¹²gwŷr ifainc a gwyryfon,

hynafgwyr a llanciau hefyd.

¹³Bydded iddynt foli enw'r ARGLWYDD,

oherwydd ei enw ef yn unig sydd ddyrchafedig,

ac y mae ei ogoniant ef uwchlaw daear a nefoedd.

¹⁴Y mae wedi dyrchafu corn ei bobl,

ac ef yw moliant ei holl ffyddloniaid,

pobl Israel, sy'n agos ato.

Molwch yr ARGLWYDD.