Read the Bible

¹Molwch yr ARGLWYDD.

Da yw canu mawl i'n Duw ni,

oherwydd hyfryd a gweddus yw mawl.

²Y mae'r ARGLWYDD yn adeiladu Jerwsalem,

y mae'n casglu rhai gwasgaredig Israel.

³Y mae'n iacháu'r rhai drylliedig o galon,

ac yn rhwymo eu doluriau.

⁴Y mae'n pennu nifer y sêr,

ac yn rhoi enwau arnynt i gyd.

⁵Mawr yw ein Harglwydd ni, a chryf o nerth;

y mae ei ddoethineb yn ddifesur.

⁶Y mae'r ARGLWYDD yn codi'r rhai gostyngedig,

ond yn bwrw'r drygionus i'r llawr.

⁷Canwch i'r ARGLWYDD mewn diolch,

canwch fawl i'n Duw â'r delyn.

⁸Y mae ef yn gorchuddio'r nefoedd â chymylau,

ac yn darparu glaw i'r ddaear;

y mae'n gwisgo'r mynyddoedd â glaswellt,

a phlanhigion at wasanaeth pobl.

⁹Y mae'n rhoi eu porthiant i'r anifeiliaid,

a'r hyn a ofynnant i gywion y gigfran.

¹⁰Nid yw'n ymhyfrydu yn nerth march,

nac yn cael pleser yng nghyhyrau gŵr;

¹¹ond pleser yr ARGLWYDD yw'r rhai sy'n ei ofni,

y rhai sy'n gobeithio yn ei gariad.

¹²Molianna yr ARGLWYDD, O Jerwsalem;

mola dy Dduw, O Seion,

¹³oherwydd cryfhaodd farrau dy byrth,

a bendithiodd dy blant o'th fewn.

¹⁴Y mae'n rhoi heddwch i'th derfynau,

ac yn dy ddigoni â'r ŷd gorau.

¹⁵Y mae'n anfon ei orchymyn i'r ddaear,

ac y mae ei air yn rhedeg yn gyflym.

¹⁶Y mae'n rhoi eira fel gwlân,

yn taenu barrug fel lludw,

¹⁷ac yn gwasgaru ei rew fel briwsion;

pwy a all ddal ei oerni ef?

¹⁸Y mae'n anfon ei air, ac yn eu toddi;

gwna i'w wynt chwythu, ac fe lifa'r dyfroedd.

¹⁹Y mae'n mynegi ei air i Jacob,

ei ddeddfau a'i farnau i Israel;

²⁰ni wnaeth fel hyn ag unrhyw genedl,

na dysgu iddynt ei farnau.

Molwch yr ARGLWYDD.