Read the Bible

¹Daeth dinistrydd i fyny yn dy erbyn;

diogela'r amddiffynfa, gwylia'r ffordd,

rhwyma dy wregys, a chasgla dy nerth ynghyd.

²Y mae'r ARGLWYDD yn adfer gogoniant Jacob,

a gogoniant Israel yr un modd,

er i'r anrheithwyr eu difetha

a dinoethi eu canghennau.

³Y mae tarian ei ryfelwyr yn goch,

a'r milwyr mewn ysgarlad,

a'i gerbydau yn eu rhengoedd

yn fflachio fel tân,

a'r gwŷr meirch yn prancio.

⁴Rhuthra'r cerbydau trwy'r strydoedd,

a gweu trwy'i gilydd yn y mannau agored;

fflachiant fel ffaglau,

gwibiant fel mellt.

⁵Gelwir y glewion i'r frwydr,

baglant hwythau wrth ddod;

brysiant at y mur,

a pharatoir yr amddiffyn.

⁶Agorir llifddorau'r afonydd,

ac y mae'r plas mewn dychryn;

⁷dygir y frenhines ymaith i gaethglud,

a'i morynion yn galaru,

yn cwyno fel colomennod

ac yn curo dwyfron.

⁸Y mae Ninefe fel llyn

a'i ddyfroedd yn diflannu.

“Aros! Aros!” meddant, ond nid yw neb yn troi'n ôl.

⁹Ysbeiliwch yr arian! Ysbeiliwch yr aur!

Nid oes terfyn ar y trysor,

nac ar y cyfoeth o bethau dymunol.

¹⁰Wedi ei hysbeilio, ei hanrheithio a'i dinoethi,

pob calon yn toddi, pob glin yn gwegian,

y lwynau'n crynu,

ac wyneb pawb yn gwelwi!

¹¹Ple mae ffau'r llew ac ogof y llewod ifainc,

cynefin y llew a'r llewes,

lle triga'r cenawon heb eu tarfu?

¹²Darniodd y llew ddigon i'w genawon,

a lladd ar gyfer ei lewesau;

llanwodd ei ogofeydd ag ysglyfaeth,

a'i loches â'i raib.

¹³“Wele fi yn dy erbyn,” medd ARGLWYDD y Lluoedd.

“Llosgaf dy ffau mewn mwg,

ac ysa'r cleddyf dy genawon;

torraf ymaith dy ysbail o'r tir,

ac ni chlywir mwyach sôn am dy weithredoedd.”