Read the Bible

²Duw eiddigeddus ac un sy'n dial yw'r ARGLWYDD;

y mae'r ARGLWYDD yn dial ac yn llawn llid;

y mae'r ARGLWYDD yn dial ar ei wrthwynebwyr,

ac yn dal dig at ei elynion.

³Y mae'r ARGLWYDD yn araf i ddigio ond yn fawr o nerth,

ac nid yw'n gadael yr euog yn ddi-gosb.

Y mae ei ffordd yn y corwynt a'r dymestl,

a llwch ei draed yw'r cymylau.

⁴Y mae'n ceryddu'r môr ac yn ei sychu,

ac yn gwneud pob afon yn hesb;

gwywa Basan a Charmel,

a derfydd gwyrddlesni Lebanon.

⁵Cryna'r mynyddoedd o'i flaen,

a thodda'r bryniau;

difrodir y ddaear o'i flaen,

y byd a phopeth sy'n byw ynddo.

⁶Pwy a saif o flaen ei lid?

Pwy a ddeil gynddaredd ei ddig?

Tywelltir ei lid fel tân,

a dryllir y creigiau o'i flaen.

⁷Y mae'r ARGLWYDD yn dda—yn amddiffynfa yn nydd argyfwng;

y mae'n adnabod y rhai sy'n ymddiried ynddo.

⁸Ond â llifeiriant ysgubol gwna ddiwedd llwyr ar ei wrthwynebwyr,

ac fe ymlid ei elynion i'r tywyllwch.

⁹Beth a gynlluniwch yn erbyn yr ARGLWYDD?

Gwna ef ddiwedd llwyr,

fel na ddaw blinder ddwywaith.

¹⁰Fel perth o ddrain fe'u hysir,

fel diotwyr â'u diod,

fel sofl wedi sychu'n llwyr.

¹¹Ohonot ti, Ninefe, y daeth allan un yn cynllwynio

drygioni yn erbyn yr ARGLWYDD —

cynghorwr dieflig.

“Er eu bod yn gyflawn a niferus,

eto fe'u torrir i lawr, a darfyddant.

Er imi dy flino,

ni flinaf di mwyach.

¹³Yn awr, fe ddrylliaf ei iau oddi arnat,

a thorraf dy rwymau.”

¹⁴Rhoes yr ARGLWYDD orchymyn amdanat:

“Ni fydd had o'th hil mwyach;

torraf ymaith ddelw ac eilun o dŷ dy dduwiau;

a rhoddaf i ti fedd am dy fod yn ddirmygedig.”

¹⁵Wele ar y mynyddoedd draed y negesydd

yn cyhoeddi heddwch.

Dathla dy wyliau, O Jwda,

tâl dy addunedau,

oherwydd ni ddaw'r dieflig i'th oresgyn byth eto;

fe'i torrwyd ymaith yn llwyr.