Read the Bible

“Clywch, benaethiaid Jacob, arweinwyr tŷ Israel!

Oni ddylech chwi wybod beth sy'n iawn?

²Yr ydych yn casáu daioni ac yn caru drygioni,

yn rhwygo'u croen oddi ar fy mhobl,

a'u cnawd oddi ar eu hesgyrn;

³yr ydych yn bwyta'u cnawd,

yn blingo'u croen oddi amdanynt,

yn dryllio'u hesgyrn,

yn eu malu fel cnawd i badell

ac fel cig i grochan.

⁴Yna fe waeddant ar yr ARGLWYDD,

ond ni fydd yn eu hateb;

bydd yn cuddio'i wyneb oddi wrthynt yr amser hwnnw,

am fod eu gweithredoedd mor ddrygionus.”

⁵Fel hyn y dywed yr ARGLWYDD am y proffwydi

sy'n arwain fy mhobl ar gyfeiliorn,

y rhai os cânt rywbeth i'w fwyta

sy'n cyhoeddi heddwch,

ond pan na rydd neb ddim iddynt

sy'n cyhoeddi rhyfel yn ei erbyn:

⁶“Am hyn bydd yn nos heb weledigaeth arnoch,

ac yn dywyllwch heb ddim dewiniaeth;

bydd yr haul yn machlud ar y proffwydi,

a'r dydd yn tywyllu o'u cwmpas.”

⁷Bydd y gweledyddion mewn gwarth

a'r dewiniaid mewn cywilydd;

byddant i gyd yn gorchuddio'u genau,

am nad oes ateb oddi wrth Dduw.

⁸Ond amdanaf fi, rwy'n llawn grym

ac ysbryd yr ARGLWYDD, a chyfiawnder a nerth,

i gyhoeddi ei drosedd i Jacob,

a'i bechod i Israel.

⁹Clywch hyn, benaethiaid Jacob, arweinwyr tŷ Israel,

chwi sy'n casáu cyfiawnder

ac yn gwyrdroi pob uniondeb,

¹⁰yn adeiladu Seion trwy dywallt gwaed

a Jerwsalem trwy dwyll.

¹¹Y mae ei phenaethiaid yn barnu yn ôl y tâl,

ei hoffeiriaid yn cyfarwyddo yn ôl y wobr,

ei phroffwydi yn cyflwyno neges yn ôl yr arian;

ac eto, pwysant ar yr ARGLWYDD, a dweud,

“Onid yw'r ARGLWYDD yn ein mysg?

Ni ddaw drwg arnom.”

¹²Am hynny, o'ch achos chwi

bydd Seion yn faes wedi ei aredig,

a Jerwsalem yn garneddau,

a mynydd y deml yn fynydd-dir coediog.