Read the Bible

²“Heddiw eto y mae fy nghwyn yn chwerw,

a'i law sy'n drwm er gwaethaf f'ochenaid.

³O na wyddwn ble y cawn ef,

a pha fodd i ddod at ei drigfan!

⁴Yna gosodwn fy achos o'i flaen,

a llenwi fy ngenau â dadleuon.

⁵Mynnwn wybod sut yr atebai fi,

a deall beth a ddywedai wrthyf.

⁶Ai gyda'i holl nerth y dadleuai â mi?

Na, ond fe roddai sylw imi.

⁷Sylwai mai un uniawn a ymresymai ag ef,

a chawn fy rhyddhau am byth gan fy marnwr.

⁸“Os af i'r dwyrain, nid yw ef yno;

ac os i'r gorllewin, ni chanfyddaf ef.

⁹Pan weithreda yn y gogledd, ni sylwaf;

os try i'r de, nis gwelaf.

¹⁰Ond y mae ef yn deall fy ffordd;

wedi iddo fy mhrofi, dof allan fel aur.

¹¹Dilyn fy nhroed ei lwybr;

cadwaf ei ffordd heb wyro.

¹²Ni chiliaf oddi wrth orchmynion ei enau;

cadwaf ei eiriau yn fy mynwes.

¹³Erys ef yr un, a phwy a'i try?

Fe wna beth bynnag a ddymuna.

¹⁴Yn wir fe ddwg fy nedfryd i ben,

fel llawer o rai eraill sydd ganddo.

¹⁵Am hyn yr arswydaf rhagddo;

pan ystyriaf, fe'i hofnaf.

¹⁶Duw sy'n gwanychu fy nghalon;

yr Hollalluog sy'n fy nychryn;

¹⁷nid y tywyllwch sy'n cyfyngu arnaf,

na'r fagddu'n fy nghuddio.”