Read the Bible

²“A yw unrhyw un o werth i Dduw?

Onid iddo'i hun y mae'r doeth o werth?

³A oes boddhad i'r Hollalluog pan wyt yn gyfiawn,

neu elw iddo pan wyt yn rhodio'n gywir?

⁴Ai am dy dduwioldeb y mae'n dy geryddu,

ac yn dy ddwyn i farn?

⁵Onid yw dy ddrygioni'n fawr,

a'th gamwedd yn ddiderfyn?

⁶Cymeri wystl gan dy gymrodyr yn ddiachos,

a dygi ymaith ddillad y tlawd.

⁷Ni roddi ddŵr i'r lluddedig i'w yfed,

a gwrthodi fara i'r newynog.

⁸Y cryf sy'n meddiannu'r tir,

a'r ffefryn a drig ynddo.

⁹Gyrri'r weddw ymaith yn waglaw,

ac ysigi freichiau'r amddifad.

¹⁰Am hyn y mae maglau o'th gwmpas,

a daw ofn disymwth i'th lethu,

¹¹a thywyllwch fel na elli weld,

a bydd dyfroedd yn dy orchuddio.

¹²“Onid yw Duw yn uchder y nefoedd

yn edrych i lawr ar y sêr sy mor uchel?

¹³Felly dywedi, ‘Beth a ŵyr Duw?

A all ef farnu trwy'r tywyllwch?

¹⁴Cymylau na wêl trwyddynt sy'n ei guddio,

ac ar gylch y nefoedd y mae'n rhodio.’

¹⁵A gedwi di at yr hen ffordd

y rhodiodd y drygionus ynddi?

¹⁶Cipiwyd hwy ymaith cyn pryd,

pan ysgubwyd ymaith eu sylfaen gan lif afon.

¹⁷Dyma'r rhai a ddywedodd wrth Dduw, ‘Cilia oddi wrthym’.

Beth a wnaeth yr Hollalluog iddynt hwy?

¹⁸Er iddo lenwi eu tai â daioni,

pell yw cyngor y drygionus oddi wrtho.

¹⁹Gwêl y cyfiawn hyn, a llawenha;

a gwatwerir hwy gan y dieuog.

²⁰Yn wir, dinistriwyd eu cynhaeaf,

ac ysodd y tân eu llawnder.

²¹“Cytuna ag ef, a chei lwyddiant;

trwy hyn y daw daioni i ti.

²²Derbyn gyfarwyddyd o'i enau,

a chadw ei eiriau yn dy galon.

²³Os dychweli at yr Hollalluog mewn gwirionedd,

a gyrru anghyfiawnder ymhell o'th babell,

²⁴os ystyri aur fel pridd,

aur Offir fel cerrig y nentydd,

²⁵yna bydd yr Hollalluog yn aur iti,

ac yn arian pur.

²⁶Yna cei ymhyfrydu yn yr Hollalluog,

a dyrchafu dy wyneb at Dduw.

²⁷Cei weddïo arno, ac fe'th wrendy,

a byddi'n cyflawni dy addunedau.

²⁸Pan wnei gynllun, fe lwydda iti,

a llewyrcha goleuni ar dy ffyrdd.

²⁹Fe ddarostyngir y rhai a ystyri'n falch;

yr isel ei fryd a wareda ef.

³⁰Fe achub ef y dieuog;

achubir ef am fod ei ddwylo'n lân.”