Read the Bible

¹Dychwel, Israel at yr ARGLWYDD dy Dduw,

canys syrthiaist oherwydd dy ddrygioni.

²Cymerwch eiriau gyda chwi,

a dychwelwch at yr ARGLWYDD;

dywedwch wrtho, “Maddau'r holl ddrygioni,

derbyn ddaioni, a rhown i ti ffrwyth ein gwefusau.

³Ni all Asyria ein hachub,

ac ni farchogwn ar geffylau;

ac wrth waith ein dwylo

ni ddywedwn eto, ‘Ein Duw’.

Ynot ti y caiff yr amddifad drugaredd.”

⁴“Iachâf eu hanffyddlondeb;

fe'u caraf o'm bodd,

oherwydd trodd fy llid oddi wrthynt.

⁵Byddaf fel gwlith i Israel;

blodeua fel lili

a lleda'i wraidd fel pren poplys.

⁶Lleda'i flagur,

a bydd ei brydferthwch fel yr olewydden,

a'i arogl fel Lebanon.

⁷Dychwelant a thrigo yn fy nghysgod;

cynhyrchant ŷd,

ffrwythant fel y winwydden,

bydd eu harogl fel gwin Lebanon.

⁸“Beth sydd a wnelo Effraim mwy ag eilunod?

Myfi sydd yn ei ateb ac yn ei arwain yn gywir.

Yr wyf fi fel cypreswydden ddeiliog;

oddi wrthyf y daw dy ffrwyth.”

⁹Pwy bynnag sydd ddoeth, dealled hyn;

pwy bynnag sydd ddeallgar, gwybydded.

Oherwydd y mae ffyrdd yr ARGLWYDD yn gywir;

rhodia'r cyfiawn ynddynt,

ond meglir y drygionus ynddynt.