Read the Bible

¹Y mae Effraim yn bugeilio gwynt,

ac yn dilyn gwynt y dwyrain trwy'r dydd;

amlhânt dwyll a thrais;

gwnânt gytundeb ag Asyria,

a dygant olew i'r Aifft.

²Y mae gan yr ARGLWYDD achos yn erbyn Jwda;

fe gosba Jacob yn ôl ei ffyrdd,

a thalu iddo yn ôl ei weithredoedd.

³Yn y groth gafaelodd yn sawdl ei frawd,

ac wedi iddo dyfu ymdrechodd â Duw.

⁴Ymdrechodd â'r angel a gorchfygu;

wylodd a cheisiodd ei ffafr.

Ym Methel y cafodd ef,

a siarad yno ag ef —

⁵ARGLWYDD Dduw y lluoedd,

yr ARGLWYDD yw ei enw.

⁶A thithau, trwy nerth dy Dduw, dychwel,

cadw deyrngarwch a barn,

a disgwyl wrth dy Dduw bob amser.

⁷Y mae masnachwr a chanddo gloriannau twyllodrus

yn caru gorthrymu.

⁸Dywedodd Effraim, “Yn wir, rwy'n gyfoethog,

ac enillais olud;

yn fy holl enillion ni cheir

na drygioni na phechod.”

⁹“Myfi yw'r ARGLWYDD dy Dduw,

a'th ddygodd o wlad yr Aifft;

gwnaf iti eto drigo mewn pebyll,

fel yn nyddiau'r ŵyl sefydlog.

¹⁰“Lleferais wrth y proffwydi;

ac amlheais weledigaethau

a dangos gwers trwy'r proffwydi.

¹¹Am fod eilunod yn Gilead,

pethau cwbl ddiddim;

am fod aberthu teirw yn Gilgal,

bydd eu hallorau fel pentyrrau cerrig

ar rychau'r meysydd.”

¹²Ffodd Jacob i dir Aram;

gwasanaethodd Israel am wraig;

am wraig y cadwodd ddefaid.

¹³Trwy broffwyd y dygodd yr ARGLWYDD Israel o'r Aifft,

a thrwy broffwyd y cadwyd ef.

¹⁴Cythruddodd Effraim ef yn chwerw,

a bydd i'w Arglwydd ei adael yn ei euogrwydd,

a throi ei waradwydd yn ôl arno.