Read the Bible

¹Safaf ar fy nisgwylfa,

a chymryd fy safle ar y tŵr;

syllaf i weld beth a ddywed wrthyf,

a beth fydd ei ateb i'm cwyn.

²Atebodd yr ARGLWYDD fi:

“Ysgrifenna'r weledigaeth,

a gwna hi'n eglur ar lechen,

fel y gellir ei darllen wrth redeg;

³oherwydd fe ddaw eto weledigaeth yn ei hamser—

daw ar frys i'w chyflawni, a heb ball.

Yn wir nid oeda; disgwyl amdani,

oherwydd yn sicr fe ddaw, a heb fethu.

⁴Yr un nad yw ei enaid yn uniawn sy'n ddi-hid,

ond bydd y cyfiawn fyw trwy ei ffyddlondeb.”

⁵Y mae cyfoeth yn dwyllodrus, yn gwneud rhywun yn falch a di-ddal;

y mae yntau'n lledu ei safn fel Sheol,

ac fel marwolaeth yn anniwall,

yn casglu'r holl genhedloedd iddo'i hun

ac yn cynnull ato'r holl bobloedd.

⁶Oni fyddant i gyd yn adrodd dychan yn ei erbyn,

ac yn ei watwar yn sbeitlyd a dweud,

“Gwae'r sawl sy'n pentyrru'r hyn nad yw'n eiddo iddo,

ac yn cadw iddo'i hun wystl y dyledwr.”

⁷Oni chyfyd dy echwynwyr yn sydyn,

ac oni ddeffry'r rhai sy'n dy ddychryn,

a thithau'n syrthio'n ysglyfaeth iddynt?

⁸Am i ti dy hun ysbeilio cenhedloedd lawer,

bydd gweddill pobloedd y byd yn dy ysbeilio di,

o achos y tywallt gwaed a'r anrheithio ar y tir

a'r ddinas a'i holl drigolion.

⁹Gwae'r sawl a gais enillion drygionus i'w feddiant,

er mwyn gosod ei nyth yn uchel,

a'i waredu ei hun o afael blinder.

¹⁰Cynlluniaist warth i'th dŷ dy hun

trwy dorri ymaith bobloedd lawer,

a pheryglaist dy einioes dy hun.

¹¹Oherwydd gwaedda'r garreg o'r mur,

ac etyb trawst o'r gwaith coed.

¹²Gwae'r sawl sy'n adeiladu dinas trwy waed,

ac yn sylfaenu dinas ar anghyfiawnder.

¹³Wele, onid oddi wrth ARGLWYDD y Lluoedd y daw hyn:

fod pobloedd yn llafurio i ddim ond tân,

a chenhedloedd yn ymdrechu i ddim o gwbl?

¹⁴Oherwydd llenwir y ddaear â gwybodaeth o ogoniant yr ARGLWYDD,

fel y mae'r dyfroedd yn llenwi'r môr.

¹⁵Gwae'r sawl sy'n gwneud i'w gymydog yfed o gwpan ei lid,

ac yn ei feddwi er mwyn cael gweld ei noethni.

¹⁶Byddi'n llawn o warth, ac nid o ogoniant.

Yf dithau nes y byddi'n simsan.

Atat ti y daw cwpan deheulaw'r ARGLWYDD,

a bydd dy warth yn fwy na'th ogoniant.

¹⁷Bydd y trais a wnaed yn Lebanon yn dy oresgyn,

a dinistr yr anifeiliaid yn dy arswydo,

o achos y tywallt gwaed a'r anrheithio ar y tir

a'r ddinas a'i holl drigolion.

¹⁸Pa fudd i'w wneuthurwr yw'r eilun a luniodd?

Nid yw ond delw dawdd a dysgwr celwydd.

Er bod y gwneuthurwr yn ymddiried yn ei waith,

nid yw'n gwneud ond delwau mud.

¹⁹Gwae'r sawl a ddywed wrth bren, “Deffro”,

ac wrth garreg fud, “Ymysgwyd”.

Y mae wedi ei amgylchu ag aur ac arian,

ond nid oes dim anadl ynddo.

²⁰Ond y mae'r ARGLWYDD yn ei deml sanctaidd;

bydded i'r holl ddaear ymdawelu ger ei fron.