Read the Bible

“Daeth y diwedd ar fy mhobl Israel;

nid af heibio iddynt byth eto.

³Bydd cantorion y deml yn galarnadu yn y dydd hwnnw,” medd yr Arglwydd DDUW,

“bod y cyrff mor niferus

fel y teflir hwy'n ddisôn ym mhob man.”

⁴Gwrandewch hyn, chwi sy'n sathru'r anghenus

ac yn difa tlodion y wlad,

⁵ac yn dweud, “Pa bryd y mae'r newydd-loer yn diweddu,

inni gael gwerthu ŷd;

a'r saboth, inni roi'r grawn ar werth,

inni leihau'r effa a thrymhau'r sicl,

inni gael twyllo â chloriannau anghywir,

⁶inni gael prynu'r tlawd am arian

a'r anghenus am bâr o sandalau,

a gwerthu ysgubion yr ŷd?”

⁷Tyngodd yr ARGLWYDD i falchder Jacob,

“Ni allaf fyth anghofio'u gweithredoedd.

⁸Onid am hyn y cryna'r ddaear

nes y galara'i holl drigolion,

ac y cwyd i gyd fel y Neil,

a dygyfor a gostwng fel afon yr Aifft?”

⁹“Y dydd hwnnw,” medd yr Arglwydd DDUW,

“gwnaf i'r haul fachlud am hanner dydd,

a thywyllaf y ddaear gefn dydd golau.

¹⁰Trof eich gwyliau yn alaru

a'ch holl ganiadau yn wylofain;

rhof sachliain am eich llwynau

a moelni ar eich pennau.

Fe'i gwnaf yn debyg i alar am unig fab;

bydd ei ddiwedd yn ddiwrnod chwerw.

¹¹“Wele'r dyddiau yn dod,” medd yr Arglwydd DDUW,

“pan anfonaf newyn i'r wlad;

nid newyn am fara, na syched am ddŵr,

ond am glywed geiriau'r ARGLWYDD.

¹²Crwydrant o fôr i fôr

ac o'r gogledd i'r dwyrain;

ânt yn ôl ac ymlaen i geisio gair yr ARGLWYDD,

ond heb ei gael.

¹³“Yn y dydd hwnnw, bydd gwyryfon teg a gwŷr ifainc

yn llewygu o syched.

¹⁴Y rhai sy'n tyngu i Asima Samaria,

ac yn dweud, ‘Cyn wired â bod dy dduw yn fyw, Dan’,

neu, ‘Cyn wired â bod dy dduw yn fyw, Beerseba’—

fe syrthiant oll heb godi byth mwy.”