Read the Bible

“Am dri o droseddau Moab,

ac am bedwar, ni throf y gosb yn ôl;

am iddo losgi'n galch esgyrn brenin Edom,

²anfonaf dân ar Moab,

ac fe ddifa geyrydd Cerioth.

Bydd farw Moab yng nghanol terfysg,

yng nghanol banllefau a sŵn utgorn.

³Torraf ymaith y pennaeth o'i chanol,

a lladdaf ei holl swyddogion gydag ef,” medd yr ARGLWYDD.

“Am dri o droseddau Jwda,

ac am bedwar, ni throf y gosb yn ôl;

am iddynt wrthod cyfraith yr ARGLWYDD,

a pheidio â chadw ei ddeddfau,

a'u denu ar gyfeiliorn gan y celwyddau

a ddilynwyd gan eu hynafiaid,

⁵anfonaf dân ar Jwda,

ac fe ddifa geyrydd Jerwsalem.”

“Am dri o droseddau Israel,

ac am bedwar, ni throf y gosb yn ôl;

am iddynt werthu'r cyfiawn am arian

a'r anghenog am bâr o sandalau;

⁷am eu bod yn sathru pen y tlawd i'r llwch

ac yn ystumio ffordd y gorthrymedig;

am fod dyn a'i dad yn mynd at yr un llances,

fel bod halogi ar fy enw sanctaidd;

⁸am eu bod yn gorwedd ar ddillad gwystl

yn ymyl pob allor;

am eu bod yn yfed gwin y ddirwy

yn nhŷ eu Duw.

⁹“Eto, myfi a ddinistriodd yr Amoriad o'u blaenau,

a'i uchder fel uchder cedrwydd

a'i gryfder fel y derw;

dinistriais ei ffrwyth oddi arno

a'i wreiddiau oddi tano.

¹⁰Myfi hefyd a'ch dygodd o'r Aifft,

a'ch arwain am ddeugain mlynedd yn yr anialwch,

i feddiannu gwlad yr Amoriad.

¹¹Codais rai o'ch meibion yn broffwydi,

a rhai o'ch llanciau yn Nasareaid.

Onid fel hyn y bu, bobl Israel?” medd yr ARGLWYDD.

¹²“Ond gwnaethoch i'r Nasareaid yfed gwin,

a rhoesoch orchymyn i'r proffwydi, ‘Peidiwch â phroffwydo.’

¹³“Wele, yr wyf am eich gwasgu i lawr,

fel y mae trol lawn ysgubau yn gwasgu.

¹⁴Derfydd am ddihangfa i'r cyflym,

ac ni ddeil y cryf yn ei gryfder,

ac ni all y rhyfelwr ei waredu ei hun;

¹⁵ni saif y saethwr bwa;

ni all y cyflym ei droed ei achub ei hun,

na'r marchog ei waredu ei hun;

¹⁶bydd y dewraf ei galon o'r rhyfelwyr

yn ffoi yn noeth yn y dydd hwnnw,” medd yr ARGLWYDD.