Read the Bible

¹Ple hwrug dha garadow mos,

A dekka yn mysk benynes?

Ple hwrug dha garadow treylya,

may hwren ni y hwilas genes?

²Y hwrug ow haradow mos yn-nans dh'y lowarth,

dhe vleujyowegi an spisys,

rag peuri y flokk y'n lowarthyow,

ha kuntell lili.

³Dhe'm karadow ov vy ha dhymmo vy yw ow haradow,

neb a beur y flokk yn mysk an lili.

⁴Mar deg avel Tirsa osta, ow hares,

mar hweg avel Yerusalem,

euthyk kepar ha lu gans baneryow.

⁵Treyl dha dhewlagas dhe-ves dhiworthiv,

rag i a'm feth.

Dha vlew yw kepar ha gre a ever,

ow lamma yn-nans war ledrow Gilead.

⁶Dha dhyns yw kepar ha flokk a dheves,

devedhys yn-bann dhiworth an wolghva,

pub huni anedha ow toen gevellyon,

heb onan vyth anedha ow kelli askorr.

⁷Dha dhiwvogh yw avel tamm a reunaval

a-dryv dha vayl.

⁸Yma tri-ugens myghternes ha peswar-ugens iswreg,

ha gwyrghesow heb niver.

⁹Onan yw ow holommenn, ow benyn berfydh;

an unn vyrgh yw hi dh'y mamm,

heb namm dhe neb a's omdhuk.

Myrghes a's gwelas ha keslowenhe gensi,

myghternesow hag iswragedh a's gormolas.

¹⁰‘Piw yw homma neb a vir yn-nans kepar ha'n bora,

mar deg avel an loer, mar splann avel an howl,

euthyk kepar ha lu gans baneryow?’

¹¹My eth yn-nans dhe lowarth an know

rag hwithra an eginyow y'n nans,

dhe weles mar kwrug an gwinbrennyer glasa,

mar kwrug an greunavalow bleujyowa.

¹²Kyns my dhe gonvedhes, ow enev a'm gorras

war jarettow ow fobel, avel penntern.

¹³Dehwel, dehwel, A Shulammyades,

dehwel, dehwel, may hwren ni mires orthis.

Prag y firowgh orth an Shulammyades,

kepar hag orth donsyow dew rew?