Read the Bible

¹Ytho y lavarav, a dewlis Duw y bobel dhe-ves? Bynner re bo! Rag my yw Ysraelyas dhiworth has Abraham, a eghenn Benyamin. ²Ny dewlis Duw y bobel dhe-ves neb a ragaswonnis ev. Po a ny wodhowgh hwi pandr'a lever an skryptor a-dro dhe Elias, fatell bys ev Duw erbynn Ysrael? ³‘A Arloedh, dha brofoesi a ladhsons, dha alteryow re dhistrusons ha my a veu gesys ow honan hag i a hwila ow bewnans.’ ⁴Mes pandr'a lever dhodho an gorthyp duwel? ‘My re withas dhymmo vy ow honan seyth mil wour na blegsons aga glin a-rag Baal.’ ⁵Ytho yndella y'n eur ma yma remenant herwydh dewis a ras. ⁶Ha mars yw a ras, nyns yw na fella a oberow, po ny via gras na fella gras.

⁷Pandra ytho? Ysrael a fyllis a gavoes an pyth a hwila. An re dhewisys a'n kavas ha'n re erell a veu kaleshes, ⁸dell yw skrifys,

⁹Ha Davydh a lever,

¹¹My a lever ytho, A drebuchsons i rag may koetthens? Bynner re bo! Mes der aga threuspass deuva selwyans dhe'n kenedhlow, bys ma'n jeves Ysrael avi. ¹²Mes mars yw aga threuspass rychys rag an bys, ha mars yw aga difyk devedhys ha bos rychys rag an kenedhlow, kemmys moy aga leunder!

¹³Mes dhywgh hwi y lavarav, A genedhlow, seul gemmys ytho dell ov abostol dhe'n kenedhlow, y feurhav ow gonis ¹⁴rag may hwrylliv dhe'n re yw a'm kig evy perthi avi, hag yndella selwel rann anedha. ¹⁵Rag mars yw aga thewlel dhe-ves unnverheans an bys, pyth yw aga degemmeres marnas bewnans a vernans? ¹⁶Ha mars yw an kynsa frut sans, yndella ynwedh yw an toes gwrys anedhi; ha mars yw an wreydhenn sans, yndella yw an skorrennow.

¹⁷Mes mar pe rann a'n skorrennow terrys dhe-ves ha ty, olewenn woedh, ympys yn aga le dhe gevrenna yn gwreydhenn ha sugen an olewenn, ¹⁸na vost war an skorrennow, mes mar postyth, an wreydhenn a'th teg ha ny dhegedh an wreydhenn. ¹⁹Ty a lever ytho: ‘Terrys dhe-ves veu skorrennow rag may fen vy ympys a-ji.’ ²⁰Gwir yw! Drefenn diskryjyans y fons i terrys, ha ty dre gryjyans a sev. Na gemmer goeth, mes porth own! ²¹Rag mar ny sparyas Duw an skorrennow naturel, ny'th spar tejy. ²²Gwel ytho kuvder hag sevureth Duw; sevureth a'n eyl tu orth an re re goedhas hag a'y gila kuvder Duw orthis, mar pesydh yn y guvder, poken y fydhydh treghys dhe-ves ynwedh. ²³Ha'n re na ynwedh, mar ny besyons yn aga diskryjyans, a vydh ympys a-ji, rag Duw a yll aga dasympya a-ji. ²⁴Ty mar peus treghys dhiwar olewenn yw dre natur goedh, hag ympys (ha hemma erbynn natur) yn olewenn vegys, a gemmys moy y fydh an skorrennow naturel dasympys a'ga olewenn aga honan.

²⁵Rag ny vynnav hwi dhe vos heb godhvos, a vreder, a'n kevrin ma, ma na vewgh ynnowgh hwi agas honan fur: kalesenn dhe vos devedhys yn rann war Ysrael, bys pan dheffo a-ji an myns kowal a'n kenedhlow, ²⁶hag yndella oll Ysrael a vydh selwys, dell re beu skrifys,

²⁸Ow tochya an aweyl, eskerens yns dhe Dhuw, a'th wovis; mes ow tochya dewisyans, kerys yns a-barth an tasow. ²⁹Rag antreylyadow yw rohow ha galow Duw. ³⁰Rag dell ewgh hwi kyns diwostyth dhe Dhuw mes lemmyn re gevsowgh tregeredh der aga diwostytter, ³¹yndella i ynwedh re beu diwostyth lemmyn rag may kaffons tregeredh der an dregeredh re gevsowgh. ³²Rag Duw re dhegeas oll yn diwostytter rag may tiskwettho tregeredh dhe beub.

³³O, downder rychys Duw ha'y furneth ha'y wodhvos! Ass yw y vreus dres konvedhes, ha dres hwithra y fordhow!

³⁶Rag anodho ha dredho ha dhodho yma pup-tra. Dhodho re bo gordhyans bys vykken!