Read the Bible

¹Pleg dha skovarn yn-nans, A Arloedh, ha gorthyp dhymm,

rag boghosek ov vy hag edhommek.

²Gwith ow enev, rag len ov vy;

salw dha was, ow Duw, a drest ynnos.

³Bydh grassyes orthiv, A Arloedh,

rag warnas y halwav oll an jydh.

⁴Lowenha enev dha was,

rag dhiso jy, A Arloedh, y trehavav ow enev.

⁵Rag ty, A Arloedh, yw kuv ha parys dhe ava,

meur dha dregeredh orth oll an re a elow warnas.

⁶Ro skovarn, A Arloedh, dhe'm pysadow,

ha goslow dhe lev ow govynnadow.

⁷Yn jydh ow anken y halwav warnas,

rag ty a worthyp dhymm.

⁸Yn mysk an duwow nyns eus nagonan kepar ha ty, A Arloedh,

ha nyns eus gwriansow kepar ha'th wriansow jy.

⁹Oll an kenedhlow a wrussys a dheu

hag omblegya a-dheragos, A Arloedh,

ha gordhya dha hanow.

¹⁰Rag meur osta, ha ty a wra marthusyon;

ty unnsel yw Duw.

¹¹Dysk dhymm dha fordh, A Arloedh,

ha my a gerdh y'th wirder;

lowenhes ow holonn, mayth ownniv dha hanow.

¹²My a'th wormel, A Arloedh ow Duw, a leun golonn,

ha my a wordh dha hanow bys vykken.

¹³Rag meur yw dha dregeredh orthiv;

ty re dhelivras ow enev dhiworth Sheol isella.

¹⁴A Dhuw, an re woethus re sevis er ow fynn,

ha kuntellesow an dus fell re hwilas ow enev,

ha ny'th worrsons a-dheragdha.

¹⁵Mes ty, A Arloedh, yw Duw truedhek ha grassyes,

lent ow serri, ha meur dha dregeredh ha'th wirder.

¹⁶Treyl dhymmo vy, ha bydh grassyes orthiv;

ro dha nerth dhe'th was,

ha salw mab dha vaghteth.

¹⁷Diskwa dhymm tokyn a'th tader,

ma'n gwello an re a'm kas, ha perthi meth,

rag ty, A Arloedh, re weresas dhymm, ha'm hebaskhe.