Salmow 64
Dhe vester an keur. Salm a Davydh.
1Klew ow lev, A Dhuw, y'm krodhvol;
gwith ow bewnans rag own a'n eskar.
2Kudh vy rag kusul gel an debeles,
rag freudh an dhrogoberoryon,
3neb a lymmas aga thaves avel kledha,
hag a dewlis lavarow hwerow avel sethow;
4rag may tennons yn keladow erbynn an den divlam;
desempis i a denn er y bynn, heb perthi own.
5I a ynni aga honan dhe dhregynn;
i a omgusul a gudha antylli,
hag yn-medhons, ‘Piw a wel?’
6I a hwila anewnderow,
i a gudh aga brasow.
Kowses gour ha'y golonn yw down.
7Mes Duw a denn y seth er aga fynn;
desempis i a vydh goliys.
8Ytho ev a's diswra drefenn aga thavosow aga honan;
seul a's gwel a shak an penn.
9Ha pub den oll a berth own,
ha derivas gweythres Duw,
ha prederi yn town a'y ober ev.
10An den gwiryon a lowenha y'n Arloedh,
hag a hwila skovva ynno ev.
Re vostyo oll an re yw ewn aga holonn.