Read the Bible

¹Kammweythres a gews dhe'n tebelwas

a-bervedh yn y golonn

nyns eus own Duw

a-dherag y dhewlagas.

²Rag ev a fekyl y honan a-dherag y dhewlagas y honan

na vydh y gammweyth kasadow diskudhys.

³Geryow y anow yw gwag ha toell;

ev re astelas bos fur ha gul da.

⁴Ev a dewl dregynn war y weli;

hag ev a worr y honan yn fordh nag yw da;

ny hepkorr sherewneth.

⁵Yma dha dregeredh, A Arloedh, y'n nevow,

ha'th lenduri a dhrehedh bys y'n ebron.

⁶Dha ewnder yw kepar ha menydhyow Duw,

dha vreusow yw kepar ha'n downder meur.

Ty, A Arloedh, a selow den hag enyval.

⁷Ass yw drudh dha dregeredh, A Dhuw!

Mebyon den a hwila skovva yn-dann skeus dha eskelli.

⁸I a vydh lenwys a helder dha ji,

ha ty a wra dhedha eva dhiworth avon dha blesours.

⁹Rag genes jy yma fenten bewnans;

y'th wolow jy y hwelyn ni golow.

¹⁰Ystynn dha dregeredh dhe'n re a'th aswonn,

ha'th ewnder dhe'n re ewnhynsek aga holonn!

¹¹Na dhes troes an den goethus er ow fynn,

na'm herdhyes vy dhe-ves leuv an debeles.

¹²Ena re goedhas an dhrogoberoryon;

tewlys yns i dhe'n dor, ha ny yllons sevel.