Read the Bible

¹Striv, A Arloedh, gans an re a striv genev;

omladh erbynn an re a omladh er ow fynn.

²Dalghenn an skoes ha'n bokler,

ha sav rag ow gweres.

³Tenn an guw yn-mes,

ha ke an fordh erbynn an re a'm helgh;

lavar dhe'm enev,

‘My yw dha selwyans.’

⁴Perthes meth, ha bedhes konfondys

neb a hwila ow enev;

bedhes treylys war-dhelergh ha shyndys,

neb a dhevis ow fystik.

⁵Bedhens i avel kulyn a-dherag an gwyns,

hag el an Arloedh orth aga herdhya.

⁶Bedhes aga fordh tewl ha slynk,

hag el an Arloedh orth aga helghya.

⁷Rag heb ken i re gudhas aga roes dhymm yn pytt;

heb ken i re balas pytt rag ow enev.

⁸Bedhes ev sowdhenys gans terroes,

ha bedhes ev kemmerys y'n roes a gudhas ev;

koedhes ev ynni dhe derroes.

⁹Ha'm enev a vydh heudhik y'n Arloedh,

ow lowenhe yn y selwyans.

¹⁰Ow eskern oll a lever,

A Arloedh, piw yw avelos jy,

ow telivra an den gwann

dhiworth piwpynag a vo re grev ragdho,

an den gwann ha boghosek dhiworth neb a'n pyll.

¹¹Fals dhustuniow a sev;

i a wovynn dhiworthiv taklow nag aswonnav.

¹²I a attylis dhymm drog rag da,

ha hemma o kollva dhe'm enev.

¹³Pan ens i klav,

my a omwiskas yn yskar,

hag uvelhe ow enev gans penys,

ha'm pysadow a dhehwelis heb gorthyp.

¹⁴My a gerdhas a-dro ow kyni kepar ha pan ve ow howeth po ow broder;

my a blegyas dhe'n dor yn galarwisk,

kepar ha den ow kyni y vamm.

¹⁵Ha pan drebuchis vy, i a omguntellas yn lowen,

avel estrenyon na aswonnis vy

i a omguntellas er ow fynn;

i a'm skwardyas heb hedhi.

¹⁶Avel tus ongrassyes i a wrug ges ahanav,

i a dheskornas aga dyns orthiv.

¹⁷Arloedh, pygemmys prys y firydh?

Delirv ow enev dhiworth an re a us,

ow bewnans dhiworth an lewyon.

¹⁸My a ras dhis y'n kuntelles meur;

my a'th wormel yn mysk routh veur.

¹⁹Na as ow fals eskerens dhe lowenhe a-dro dhymm;

na as an re a'm kas heb ken dhe wynkya gans an lagas.

²⁰Rag ny gewsons a gres,

mes i a dhevis fals eryow

erbynn an re yw kosel y'n tir.

²¹I a igoras aga ganow a-les er ow fynn;

i a leveris, ‘Aha, aha,

agan lagas re'n gwelas.’

²²Ty re'n gwelas, A Arloedh; ytho na vydh tawesek,

A Arloedh, na vydh pell dhiworthiv.

²³Sav, ha difun rag ow gwirvreus,

rag pledya ow hen, ow Duw ha'm Arloedh.

²⁴Breus vy, A Arloedh ow Duw, y'th ewnder,

ha na as i dhe lowenhe a-dro dhymm.

²⁵Na as i dhe leverel yn aga holonn,

‘Gwynn agan bys’;

na as i dhe leverel, ‘Ni re'n kollonkas.’

²⁶Perthens i meth ha bedhens i shyndys war-barth

neb a lowenha y'm happ drog;

bedhens i gwiskys yn meth ha despit

neb a voghha aga honan er ow fynn.

²⁷Garmes yn lowen ha bedhes heudhik

an re a lowenha y'm ewnder,

ha prest leverens i,

‘Meur yw an Arloedh,

neb yw hwansek dhe les y was.’

²⁸Ha'm taves a gews a'th ewnder,

hag a'th wormola oll an jydh.