Salmow 12
Dhe vester an keur: war Sheminith. Salm a Davydh.
1Salw, A Arloedh, rag nyns eus unn dremas gesys;
rag an dus len re dhifygyas mes a vebyon den.
2I a lever euveredh, pub den gans y hynsa;
gans gweus fekyl ha kolonn dhewblek y kowsons.
3An Arloedh a dregh oll gweusyow fekyl,
an taves hag a lever bostow bras,
4an re a lever, ‘Gans agan taves y tryghyn ni,
agan gweusyow yw dhyn ni; piw yw arloedh warnan ni?’
5‘Drefenn an voghosogyon dhe vos ravnys, drefenn kynvann an edhommogyon,
lemmyn my a sev’, yn-medh an Arloedh;
‘my a'n gorr y'n sawder a yeun ev.’
6Lavarow an Arloedh yw lavarow glan,
avel arghans teudhys yn forn a bri,
purhes seythgweyth.
7Ty a'gan syns, A Arloedh,
ty a'gan gwith rag an genedhel ma bys vykken.
8An debeles a gerdh a bub tu,
ha bileni yw ughelhes yn mysk mebyon den.
Notes for verses 7–81 entry
Text notes
Psalms 12:7 Ty a'gan syns, A ARLOEDH, ty a'gan gwith: Ow siwya an Septuagint ha'n Vulgat. Ebrow Ty a's syns, A ARLOEDH, ty a'n gwith. View in passage