Salmow 11
Dhe vester an keur. A Davydh.
1Y'n Arloedh y hwilav skovva; fatell yllowgh leverel dhe'm enev,
‘Nij dhe'n menydh avel edhen?
2Rag otta, an debeles a bleg an warak,
i a dharbar aga sethow war an gordenn,
rag may tennons y'n tewlder dhe'n re ewn aga holonn.
3Mars yw an selyow distruys,
pandr'a yll an den gwiryon dhe wul?’
4Yma an Arloedh yn y dempel sans,
yma se an Arloedh y'n nevow;
y dhewlagas a vir, kreghyn y dhewlagas a brev mebyon den.
5An Arloedh a brev an den gwiryon ha'n tebelwas,
ha'y enev a gas an den a gar garowder.
6Ev a wra dhe golennow tan ha loskven koedha war an debeles avel glaw;
gwyns gwyls a vydh kevrenn aga hanaf.
7Rag an Arloedh yw gwiryon, ev a gar ewnder;
an den ewnhynsek a wel y fas.