Read the Bible

¹Mab fur a woslow orth dyskybleth y das,

mes ny woslow skornyer orth keredh.

²A froeth y anow gour a dheber dader,

mes hwans an re fals yw freudh.

³Neb a with y anow a saw y vewnans,

mes neb a iger y dhiwweus a-les a dheu dhe dhiswrians.

⁴Ewl an den diek a yeun, ha ny gyv mann,

mes ewl tus dhiwysyk a dhegemmer blonek.

⁵Den gwiryon a gas gow,

mes tebelwas yw divlas, ha methus y fara.

⁶Ewnder a with neb yw divlam y fordh,

mes sherewynsi a dhomhwel an peghador.

⁷Unn den a omwra rych, mes ny'n jeves travyth,

onan arall a omwra boghosek, pan y'n jeves pyth meur.

⁸Daspren bewnans den yw y byth,

mes ny'n jeves den boghosek godros.

⁹Golow an re wiryon a lowenha,

mes lugarn an debeles a vydh difeudhys.

¹⁰Dre donteth ny dheu saw strif,

mes gans an re hag a woslow orth kusul yma furneth.

¹¹Pyth kevys yn hast a leha,

mes neb a guntell tamm ha tamm a'n ynkress.

¹²Govenek delatys a wra dhe'n golonn bos klav,

mes hwans kowlwrys yw gwydhenn a vewnans.

¹³Neb a skorn an ger a dheg diswrians warnodho y honan,

mes neb a berth own a'n gorhemmynn a'n jevydh gober.

¹⁴Dyskans an re fur yw fenten a vewnans,

ow treylya den dhiworth maglennow ankow.

¹⁵Skians da a wayn favour,

mes fordhow an re dhislel yw aga therroes.

¹⁶Yn pup-tra den doeth a omdheg gans godhvos,

mes den foll a dhisplet y follneth.

¹⁷Kannas dhrog a wra dhe dus koedha yn trobel,

mes kannas lel a dheg yaghheans.

¹⁸Boghosogneth ha meth a dheu dhe neb a skorn dyskybleth,

mes neb a wra vri a geredh yw enorys.

¹⁹Hwans kowlwrys yw hweg dhe'n enev,

mes treylya dhiworth drog yw tra gasadow dhe'n re foll.

²⁰Neb a gerdh gans tus fur a dheu ha bos fur,

mes koweth an re foll a berth dregynn.

²¹Anfeus a hol peghadoryon,

mes sewena a re pewas dhe'n re wiryon.

²²Den da a as eretons dhe vebyon y vebyon,

mes pyth an peghador yw gwithys rag an den gwiryon.

²³Dor anerys an voghosogyon a re boes meur,

mes distruys yw der anewnder.

²⁴Neb a spar an welenn a gas y vab,

mes neb a'n kar a wayt ri dhodho dyskybleth.

²⁵An den gwiryon a dheber dhe walgh y enev,

mes torr an debeles a berth esow.