Read the Bible

¹Goslowewgh orth an pyth a lever an Arloedh:

Sav yn-bann, pled dha gen a-rag an menydhyow,

ha gas dhe'n breow klewes dha lev.

²Klewyewgh, hwi venydhyow, breus an Arloedh,

ha hwi selyow krev an bys;

rag an Arloedh a'n jeves ken erbynn y bobel

ha strivya a wra gans Ysrael.

³‘Ow fobel vy, pandr'a wrug evy orthis?

Ha fatell y'th skwithis? Gorthyp dhymm!

⁴Pan y'th tres yn-mes a bow Ejyp,

ha'th tasprena a ji an gethneth,

ha dannvon a-dheragos Moyses,

Aron ha Miryam.

⁵Ow fobel vy, porth kov a'n pyth a gusulyas Balak myghtern Moab,

hag a'n pyth a worthybis dhodho Balaam mab Beor,

hag a'n pyth a hwarva dhiworth Shittim bys Gilgal,

rag mayth aswonni gweythresow gwiryon an Arloedh.’

⁶‘Gans pyth a dhov a-dherag an Arloedh,

hag omblegya a-rag Duw a-vann?

A dhov a-ragdho gans offrynnow leskys,

gans leughi unn bloedh?

⁷A vydh an Arloedh pes da a vil hordh,

gans degow a vilyow a avonyow oyl?

A rov vy ow hynsa genys rag ow hammweyth,

frut ow horf rag peghes ow enev?’

⁸Ev re dhiskwedhas dhis, a dhen,

an pyth yw mas:

ha pandr'a wovynn orthis an Arloedh

marnas ty a wra gwirvreus, ha kara tregeredh,

ha kerdhes yn uvel gans dha Dhuw?

⁹Lev an Arloedh a arm war an sita,

ha doethter yw perthi own a'th hanow:

Goslowewgh an welenn ha neb a's ordenas!

¹⁰Eus hwath tresoryow drogober yn chi an debeles,

ha'n efa berr-vusurys milliges?

¹¹A reknav ewn an mantolyow kamm

ha'n sagh a fals poesow?

¹²Tus rych an sita yw leun a freudh;

hag yma hy thrigoryon ow kowleverel,

ha'ga thaves yw fekyl yn aga ganow.

¹³Rakhenna re dhallethis dha weskel,

orth dha wul ynyal drefenn dha beghosow.

¹⁴Ty a wra dybri, mes ny' fydh dha walgh,

hag y fydh nown dhis y'th kolodhyon;

ty a wra kuntell mes heb gwitha saw,

ha'n pyth a withydh a rov dhe'n kledha.

¹⁵Ty a wra hasa mes ny vysydh;

ty a wra trettya olivennow, mes ny omuntydh gans oyl;

ty a wra trettya grappys, mes ny evydh gwin.

¹⁶Ordenansow Omri yw gwithys,

hag oberow oll chi Ahab,

ha hwi a gerdh herwydh aga husul.

Rakhenna my a'th wra avel euth,

ha'y thrigoryon a vydh hwibana,

ha hwi a berth mewl ow fobel!