Read the Bible

¹Wosa ev dhe vones a-bervedh yn skath, ev a dremenas dres an mor ha dos dh'y sita y honan. ²Hag ena i a dhug dhodho unn den palsyes a'y wrowedh war ravath. Yesu pan welas aga fydh a leveris dhe'n palsi, ‘Gwellha dha jer, ow flogh; gevys yw dha beghosow.’ ³Gans henna, re an skribys a gewsis yntredha aga honan, ‘Yma an den ma ow plasfemya.’ ⁴Ha Yesu, owth aswonn aga frederow, a leveris, ‘Prag y prederowgh drog yn agas kolonn? ⁵Rag pyneyl yw esya: leverel, “Gevys yw dha beghosow”, po leverel, “Sav yn-bann ha kerdh”? ⁶Mes rag may hwodhvowgh bos galloes gans Mab an den war an norvys dhe ava peghosow’, (ena ev a leveris dhe'n palsi), ‘Sav yn-bann, drehav dha ravath ha ke dhe'th tre.’ ⁷Wosa ev dhe sevel, ev eth dh'y dre. ⁸An routhow pan y'n gwelsons a's teva own hag a wordhyas Duw neb re wrussa grontya kemmys galloes dhe dus.

⁹Ha Yesu ow tremena alena a welas den o esedhys orth an dollva, Matthew henwys, ha dhodho y leveris, ‘Gwra ow holya.’ Hag ev a sevis yn-bann hag a'n holyas. ¹⁰Pan veu Yesu esedhys orth an voes y'n chi, meur a dolloryon ha peghadoryon a dheuth a-ji hag yth ens esedhys gans Yesu ha'y dhyskyblon. ¹¹An Fariseow, pan y'n gwelsons, a leveris dh'y dhyskyblon, ‘Prag y teber agas Dyskador gans tolloryon ha peghadoryon?’ ¹²Pan y'n klewas, ev a worthybis, ‘Nyns eus edhomm a vedhek dhe dus yagh, saw dhe glevyon. ¹³Lemen ewgh ha dyskewgh styr an lavar ma, Ny vynnav sakrifis, mes tregeredh; rag nyns o'ma devedhys dhe elwel an re wiryon mes peghadoryon.’

¹⁴Ena y teuth dhodho dyskyblon Yowann ha leverel, ‘Prag y hwren ni ha'n Fariseow yn fenowgh penys heb dybri, mes dha dhyskyblon jy ny'n gwra?’ ¹⁵Yesu a leveris dhedha, ‘A yll kowetha an gour pries kyni hedre vo an gour pries gansa? Mes an dydhyow a dheu pan vydh an gour pries kemmerys dhiworta, hag y'n eur na i a wra penys heb dybri. ¹⁶Denvyth ny worr klout a bann nowydh war dhillasenn goth; poken hy klout a denn dhiworth an dhillasenn ha'n skward yw gwethhes. ¹⁷Keffrys ny worrons gwin nowydh yn gwingreghyn koth; poken an kreghynn a vydh terrys ha'n gwin a vydh skoellys ha'n kreghyn distruys; mes i a worr gwin nowydh yn kreghyn nowydh, ha'n dhew a vydh gwithys.’

¹⁸Pan esa ev ow leverel an taklow ma dhedha, unn soedhek a dheuth hag omblegya a-dheragdho ow leverel, ‘Ow myrgh re verwis nammnygen; mes deus ha gorra dha leuv warnedhi, ha hi wra bewa.’ ¹⁹Yesu a sevis ha mos war y lergh, hag ynwedh y dhyskyblon. ²⁰Hag otta, benyn neb a wodhevi dewdhek blydhen dhiworth liv goes a dheuth a-dryv dhodho ha tochya pilenn y vantell; ²¹rag hi a leveri dhedhi hy honan, ‘Mara kallav unnweyth tochya y vantell, y fydhav sawys.’ ²²Mes Yesu a dreylyas, hag orth hy gweles, yn-medh ev, ‘Gwellha dha jer, ow myrgh; dha fydh re'th sawyas.’ Ha'n venyn a veu sawys a'n eur na. ²³Pan veu Yesu devedhys dhe ji an rewler ha gweles an biboryon, ha'n routh ow kul tros, ²⁴ev a leveris, ‘Omdennewgh; rag nyns yw an vowes marow mes ow koska yma hi.’ Hag i a wrug ges anodho. ²⁵Wosa an routh dhe vos gorrys dhe-ves, ev eth a-ji ha synsi hy leuv ha'n vowes a sevis yn-bann. ²⁶Ha'n nowodhow a hemma a omlesas dres oll an pow na.

²⁷Pan esa Yesu owth omdenna alena, dew dhen dhall a'n siwyas ow karma ha leverel, ‘Kemmer truedh ahanan, ty vab Davydh.’ ²⁸Wosa ev dhe vones a-bervedh y'n chi, an dhellyon a dheuth dhodho, ha Yesu a wovynnas orta, ‘A grysowgh hwi y hallav gul hemma?’ I a worthybis, ‘Krysyn, Arloedh.’ ²⁹Ena ev a dochyas aga dewlagas ow leverel, ‘Herwydh agas fydh, bedhes gwrys dhywgh.’ ³⁰Ha'ga dewlagas a veu igerys. Yesu a a's gwarnyas yn straght ow leverel, ‘Gwaytyewgh na wodhvo denvyth.’ ³¹Mes pan ethons yn-kerdh, i a'n kyhwedhlas dres oll an pow na.

³²Wosa i dhe omdenna, y feu degys dhodho den avlavar dalghennys gans dyowl. ³³Pan veu an jowl tewlys yn-mes, an avlavar a gewsis. Ha'n routhow a's teva marth ha leverel, ‘Bythkweth ny veu gwelys tra a'n par ma yn Ysrael.’ ³⁴Mes an Fariseow a leveris, ‘Dre bryns an dhywolow ymava ow tewlel yn-mes an dhywolow.’

³⁵Ytho yth e Yesu a-dro yn oll an sitys hag y'n trevow, ow tyski yn aga synagys ha pregoth aweyl an wlaskor ha yaghhe pub kleves, ha pub dises. ³⁶Hag ev, ow mires orth an routhow, a gemmeras truedh anedha, drefenn aga bos troblys ha tewlys dhe skoell kepar ha deves heb bugel. ³⁷Ena yn-medh ev dh'y dhyskyblon, ‘Meur yw an drevas, mes tanow yw an wonisysi; ³⁸pysewgh ytho Arloedh an drevas may tannvonno gonisysi bys yn y drevas.’