Read the Bible

¹Wosa ev dhe dhiyskynna a'n menydh, routhow meur a'n siwyas. ²Hag awotta den klavorek ow tos nes a omblegyas a-dheragdho ha leverel, ‘Arloedh, mar mynnydh, ty a yll ow glanhe.’ ³Yesu owth ystynn y leuv a'n tochyas ha leverel, ‘Mynnav, bydh glan;’ ha dihwans y lovryjyon a veu glanhes. ⁴Yn-medh Yesu dhodho, ‘Gorwith na leverri ger dhe dhenvyth, mes ke hag omdhiskwa dha honan dhe'n oferyas ha doro dha ro a ordenas Moyses, avel dustuni dhedha.’

⁵Pan eth ev a-bervedh yn Kapernaum, y teuth dhodho penn-kangour, orth y bysi, ⁶ha leverel, ‘Arloedh, yma ow gwas vy a'y wrowedh palsyes y'n chi, ow kodhevel yn tynn.’ ⁷Yn-medh ev dhodho, ‘Yth av dh'y yaghhe.’ ⁸Ha'n penn-kangour a worthybis ow leverel, ‘Arloedh, nyns ov vy gwiw ty dhe dhos yn-dann ow tho, lemmyn ty na wra saw unnsel leverel an ger ha'm gwas a vydh yaghhes. ⁹Rag my ynwedh yw den yn-dann awtorita, hag a'm beus soudoryon yn-dannov, ha my a lever dhe onan, “Ke”, ha mos a wra, ha dhe arall, “Deus”, ha dos a wra, ha dhe'm kethwas, “Gwra hemma”, hag ev a'n gwra.’ ¹⁰Yesu pan glewas henna, marth a'n jeva, hag yn-medh ev dhe'n re a'n siwya, ‘Yn hwir y lavarav dhywgh, ny gevis vy kemmys fydh, na hwath yn Ysrael. ¹¹Ha my a lever y teu meur a dus dhiworth an howldrevel ha'n howlsedhes hag esedha orth moes gans Abraham hag Ysak ha Yakob yn gwlaskor nev, ¹²mes mebyon an wlaskor a vydh tewlys yn-mes dhe'n tewlder pella; ena y fydh oelva ha skrinva dyns.’ ¹³Hag yn-medh Yesu dhe'n penn-kangour, ‘Ke; ha kepar dell gryssys bedhes gwrys dhis.’ Ha'y was a veu yaghhes y'n keth eur na.

¹⁴Ha Yesu, ow tos dhe ji Peder, a welas y hweger ev a'y growedh grevys gans fevyr; ¹⁵ev a dochyas hy leuv, ha'n fevyr a's gasas; ena hi a sevis yn-bann ha'y servya ev. ¹⁶Pan o devedhys an gorthugher i a dhug dhodho lies sagh dyowl; hag ev a dewlis yn-mes an spyrysyon gans ger ha sawya oll an glevyon, ¹⁷may fe kollenwys an dra kewsys der Ysay an profoes ow leverel, ‘Ev y honan a gemmeras agan gwannegredh hag a borthas agan klevesow.’

¹⁸Pan welas Yesu routh a-dro dhodho, ev a worhemmynnis dhe omdenna dhe'n lann arall. ¹⁹Hag unn skriba a dheuth ha leverel dhodho, ‘A Dhyskador, my a wra dha holya py le pynag yth ylli.’ ²⁰Yn-medh Yesu dhodho, ‘Dhe'n lewern yma tell, ha neythow dhe ydhyn an ayr, mes dhe Vab an den nyns eus le may hyll powes y benn ynno.’ ²¹Onan arall a'y dhyskyblon a leveris dhodho, ‘Arloedh, gas vy kyns oll dhe vos dhe ynkleudhyas ow thas.’ ²²Mes Yesu a leveris dhodho, ‘Ty gwra ow holya, ha gas dhe'n re varow ynkleudhyas aga thus varow aga honan.’

²³Ena ev a yskynnas y'n skath ha'y dhyskyblon a'n siwyas. ²⁴Hag awotta, annawel veur a sevis, may feu kudhys an skath gans tonnow, mes yth esa ev ow koska. ²⁵Ha'y dhyskyblon a dheuth, hag a wrug dhodho difuna, ow leverel, ‘Arloedh, salw ni, y ferwyn!’ ²⁶Yn-medh ev dhedha, ‘Prag yth owgh hwi mar ownek, hwi a voghes fydh?’ Ena ev a sevis ha keredhi an gwynsow ha'n mor, hag y feu kalmynsi meur. ²⁷Marth a gemmeras an dus, hag yn-medhons, ‘Py par den yw hemma, mayth yw gostyth dhodho keffrys an gwynsow ha'n mor?’

²⁸Pan ova devedhys dhe'n lann arall, dhe Bow an Gadarenys, y teuth er y bynn dew sagh dhyowl, ow tos yn-mes a'n bedhow, gwyls dres eghenn, ma na ylli nebonan tremena war an fordh na. ²⁹Hag otta, i a armas ow leverel, ‘Pandr'a vynnydh tejy genen ni, A Vab Duw? Osta devedhys omma rag agan tormentya kyns an termyn?’ ³⁰Mes neb pellder dhiworta yth esa flokk veur a vogh ow peuri. ³¹Ha'n dhywolow a'n pysis ow leverel, ‘Mara kwredh agan tewlel yn-mes, dannvon ni a-bervedh yn flokk an mogh.’ ³²Yn-medh ev dhedha, ‘Ewgh ytho.’ Hag ow tos yn-mes, yth ethons a-bervedh y'n mogh; hag oll an flokk a boenyas gwyls yn-nans dres an lann serth bys y'n mor, ha merwel y'n dowrow. ³³An vugeledh a fias dhe'n fo ha mos dhe'n sita ha derivas pup-tra, keffrys ha'n pyth o hwarvedhys dhe'n dus seghyer dyowl. ³⁴Hag otta, oll an sita a dheuth yn-mes rag dyerbynna Yesu; ha pan y'n gwelsons, i a'n pysis a omdenna yn-mes a'ga oryon.