Read the Bible

¹‘Gwaytyewgh na wryllowgh agas oberow da a-rag tus rag bos gwelys gansa; poken ny'gas bydh gober vyth dhiworth agas Tas usi y'n nevow.

²‘Rakhenna ty pan rylli alusen, na hwyth korn a-dheragos kepar dell wra an fekloryon a-bervedh y'n synagys hag y'n stretys, may hallons kavoes gordhyans dhiworth tus. Yn hwir y lavarav dhywgh, i re's teva aga gober. ³Mes ty pan rylli dha alusen, na as dha leuv gledh dhe wodhvos pandr'a wra dha leuv dhyghow, ⁴rag may fo dha alusen yn-dann gel; ha'th Tas neb a wel yn-dann gel a attal dhis.

⁵‘Ha ty pan byssi, na vydh avel an fekloryon, rag i a gar pysi ow sevel a-bervedh y'n synagys ha war gernow an stretys, may hallons bos gwelys gans tus; yn hwir y lavarav dhywgh, i re's teva aga gober. ⁶Mes ty pan byssi, ke a-ji dhe'th chambour ha wosa degea dha dharas, gwra pysi dhe'th Tas usi yn-dann gel, ha'th Tas a wel yn-dann gel a attal dhis.

⁷‘Ha hwi pan byssowgh, na glappyewgh gans geryow euver avel an baganys, rag i a dyb i dhe vos klewys der aga geryow pals. ⁸Na vedhewgh ytho avella i, rag agas Tas a woer pandr'a fyll dhywgh kyns es hwi dhe wovynn orto.

⁹‘Yn kettellma ytho, gwrewgh pysi:

¹⁴Rag mara kwrewgh gava dhe dus aga hammwriansow, agas Tas nevek a wra gava dhy'hwi ynwedh; ¹⁵mes mar ny wrewgh gava dhe dus aga hammwriansow, na byth moy ny wra agas Tas gava dhywgh agas kammwriansow hwi.

¹⁶‘Ha pan wryllowgh penys heb dybri, na vedhewgh avel an fekloryon, trist aga semlans, rag i a dhifas aga bejeth may hallons bos gwelys gans tus, i dhe wul penys; yn hwir y lavarav dhywgh, i re's teva aga gober. ¹⁷Mes ty pan wrylli penys, gwra ura dha benn ha golgh dha fas, ¹⁸ma na vo apert dhe dus ty dhe wul penys, saw dhe'th Tas, usi yn-dann gel; ha'th Tas neb a wel yn-dann gel a attal dhis.

¹⁹‘Na guntellewgh dhywgh agas honan tresoryow war an nor, le may ma goedhan ha gossen ow tiswul ha may hwra ladron terri a-bervedh ha ladra. ²⁰Mes kuntellewgh dhywgh tresoryow yn nev, le na wra goedhan na gossen diswul, na ladron terri a-bervedh ha ladra; ²¹rag le may ma agas tresor, ena y fydh agas kolonn ynwedh.

²²‘Lugarn an korf yw an lagas. Rakhenna mars yw yagh dha lagas, oll dha gorf a vydh leun a wolow; ²³mes dha lagas mars yw anyagh, oll dha gorf a vydh leun a dewlder. Rakhenna mars yw an golow usi ynnos tewolgow, ass yw meur an tewolgow na!

²⁴‘Ny yll denvyth servya dew vester; rag poken ev a gas an eyl ha kara y gila, po lel yw dhe'n eyl hag ev a dhispres y gila. Ny yllowgh servya ha Duw ha mammon.

²⁵‘Rakhenna my a lever dhywgh, na wrewgh mos yn prederow a-dro dh'agas bewnans pandr'a dhebrowgh na pandr'a evowgh, na byth moy a-dro dh'agas korf pandr'a wiskowgh. A nyns yw bewnans moy ages boes, ha'n korf ages dillas? ²⁶Mirewgh orth ydhyn an ayr: ny wrons i gonis has, na mysi, na kuntell travyth yn skiberyow, hwath agas Tas nevek a's mag. A nyns owgh hwi moy agas pris agessa i? ²⁷Ha piw ahanowgh hag ev ow prederi a yll keworra pols vyth dhe dhydhyow y vewnans? ²⁸Ha prag yth owgh hwi prederus a-dro dhe dhillas? Merkewgh lili an gwel, fatell wrons i tevi; ny lavuryons ha ny nedhons; ²⁹mes yn-medhav dhywgh, nyns o Solomon yn oll y splannder gwiskys kepar hag onan a'n re ma. ³⁰Ytho mar kweth Duw yndella gwels an gwelyow, yw bew hedhyw ha tewlys yn forn a-vorow, a ny wra ev meur dhe voy agas kwetha hwi, A hwi a voghes fydh? ³¹Ytho na vedhewgh gyllys yn prederow, ow leverel, “Pandr'a dhybryn”, po “Pandr'a evyn”, po “Py ganso y fydhyn gwiskys?” ³²Rag oll an taklow ma, an kenedhlow a's hwila; ha'gas Tas nevek a woer bos edhomm dhywgh a oll an taklow ma. ³³Mes kyns oll, hwilewgh gwlaskor Duw ha'y ewnder, hag oll an taklow ma a vydh res dhywgh maga ta. ³⁴Na vedhewgh ytho prederus a'n vorow, rag an vorow a breder anedhi hy honan; lowr dhe'n jydh yw y dhrog ev y honan.